لەبارەی دابڕان/ پەیوەندی/ عربي/ English

نزیكەی 2000 منداڵی ئێزدی توشی نەخۆشی دەرونی بون

7 رۆژ پێش ئێستا


رێكخراوی لێبوردنی نێودەوڵەتی دەڵێت هێشتا كابوسی داعش بەرۆكی ژمارەیەكی زۆر لە  ئێزدی و كەمینە ئاینییەكان بەرنادات كە لەدەست ئەو گروپە تیرۆریستییە رزگاریان بووە.
 
ئەمنستی ئینتەرناشناڵ راپۆرتێكی بڵاوكردووەتەوە، دەڵێت، نزیكەی 2000 منداڵی ئێزدی كە لەلایەن داعشەوە بەبارمتە گیرابوون و دواتر رزگاركراون، ئێستا بەدەست كێشەیەكی گەورەی جەستەیی و دەرونییەوە دەناڵێنن.
 
راپۆرتەكە ناونراوە"حوكمڕانی تیرۆر: نەهامەتی منداڵە رزگاربوەكانی دەستی داعش"، رێكخراوەكە داوا دەكات جیاكردنەوەی زۆرەملێی دایكان و ئەو منداڵانەیان كۆتایی پێ بهێنرێت كە لە ئەنجامی دەستدرێژی لەلایەن چەكدارانی داعشەوە لەدایكبون، ئەگەر دایكانیشیان لەدەرەوەی وڵاتن، منداڵەكانیان بۆ بگەڕێنرێتەوە.
 
بەگوێرەی راپۆرتەكەی ئەمنستی ئینتەرناشناڵ، لەنێوان 2014 تا 2017، داعش تاوانی جەنگ و تاوانی دژی مرۆڤایەتی كردوە، لێدوانەكەی نەتەوەیەكگرتوەكانیش دوپاتدەكاتەوە كە ئەو رێكخراوە جینۆسایدی لە دژی ئێزدییەكان كردوە.
 
راپۆرتەكەی ئەمنستی بە وردی دۆخی ژیانی 1992 منداڵی ئێزدی دەخاتەڕو كە سەرەڕای ئەوەی گەڕێنراونەتەوە نێو خێزانەكانیان، بەڵام بەهۆی ئەوەی لەلایەن داعشەوە ئەشكەنجەدراون و بە زۆرەملێ شەڕیان پێكراوە و دەستدرێژیشیان كراوەتەسەر، توشی نەخۆشیی دەرونی بون و هێشتاش بەدەست ئازاری جەستەییەوە دەناڵێنن.
 
ئەمنستی دەڵێت چەندین منداڵ كە لەدەست داعش رزگار كراون، بەجۆرێك ئەشكەنجە دراون، برینەكانیان بونەتە نیشانە لەسەر جەستەیان، توشی ئیفلیجی و پەككەوتەیی بون، منداڵەكان دوچاری گەورەترین كێشەی عەقڵیش بوون. 
 
بەگوێرەی راپۆرتەكە منداڵەكان توشی چەندین نەخۆشی بون، لەوانە سترێسی دوای شۆكێكی گەورە، ناڕەحەتی و خەمۆكییەكی قورس، نیشانەی ئەو نەخۆشیانەش لە هەڵسوكەوتی رۆژانەیان رەنگدانەوەی هەیە، زۆرجار بە توندی هەڵسوكەوت دەكەن، رۆژە ناخۆشەكانیان بیردەكەوێتەوە، توشی كابوس دەبن و خۆیان لە كۆمەڵگە دابڕاندوە. 
 
مات وێڵس جێگری بەڕێوەبەری وەڵامدانەوەی قەیرانەكانی ئەمنستی ئینتەرناشناڵ دەڵێت، تا كابوسی رابردو لە هزریان بمێنێتەوە، نەهامەتی بەرۆكی ئەو منداڵانە بەرنادات.
 
وتیشی، دوای ترس و تۆقاندنێكی زۆر بەهۆی جەنگ و لەو تەمەنە لاوییەشدا، ئێستا ئەوان پێویستیان بە یارمەتی دەسەڵاتدارانی عێراقی و كۆمەڵگەی نێودەوڵەتی هەیە بۆ ئەوەی داهاتویان بوونیاد بنێن.

نوێترین

© 2016 Dwryan.net. All Rights Reserved.
Developed by Avesta Group and powered by Microsoft Azure