لەبارەی دابڕان/ پەیوەندی/ عربي/ English

ئایین و مەسرەف: مەسرەفكردنی ئایین

پێش 3 هەفتە


ئەبوبەكر حەسەن

لە ئێستادا ئایین بەشێك نییە لە ڕاگرتنی هێزو كەڵكەڵەی مەسرەفگەرایی و كولتوری مەسرەفكردن. لە گەڵ سیحرو ئەفسونی مەسرەفكردنی شتەكاندا، ئایین نەك نەیتوانیوە ڕێگر بێت لە مەسرەفكردن، بەڵكو خودی ئایین و فۆرمی ئایینداریش بووە بە بابەتی مەسرەفكردن و مەسرەفگەرایی. كەس و كۆمەڵگەی ئایینی و ئاییندار ناتوانێت پەیوەندی مرۆڤ بە شتەكانەوەو بە مەسرەفكردنی شتەكانەوە بوەستێنێت، حەرام و حەڵاڵی ئایینی ڕێگر نییە لە نوێكردنەوەی فۆرمە تەكنیك و تەكنۆلۆژیاو كەڵكەلەی بازاڕ، ئایینیش هاتۆتە بازاڕەوەو بەشێكە لە گەرموگوڕتركردنی بازاڕو ڕێككەوتن و خۆدرێژكردنەوە لە گەل ئایینی بازاڕو بازاڕدا. . (سەیر نییە كۆمەڵگە ئاییندارەكانی ڕۆژهەڵات زیاتر مەسرەفخواز بن) چیتر ئێمە مزگەوتێكی قوڕو سادەمان نییە، بەڵكو مزگەوتێكی پڕ لە زەخرەفەو ئەندازیاری نوێ و پەیوەندی نوێی نێوان مزگەوت/ نوێژكەر. هەر سروتێكی دیكەی ئایینی وەرگرین بە دابڕاویی و دوورەپەرێزی لە مەسرەفكردن بوونی نییە. ئەم ماموڵەو پەیوەندیگرتن و پەیوەندی دروستكردنە بە ناوی (حەرام و حەڵاڵ) ڕێ لەوە ناگرێت بۆ ڕیگەوبان و هاتوچۆ بیر لە ئامرازێكی مۆدێرن نەكرێتەوە كە باشترو ئارامتر بێت بۆ سەلامەتی ڕێگەوبان. ئایا خودی تێگەیشتن و خەیاڵدانی ئایینی لەوێدا كە سودو قازانجی باشتر وەرگرین لە داهێنان و دروستكراوەكان، مەحكومی مامەڵەو پەیوەندی نوێی ئەم ڕۆحە مۆدێرنە نییە كە ئایین دێنێتە ژێر باری مەسرەفكردن و مەسرەفكردنی خودی ئایینیش. چیتر ماڵی ئاییندارانیش ماڵێكی سادەو ساكار نییە لە ناو (تەنیا ئیكتیفاكردن بە پێداویستییە سەرەكییەكانەوە)، بەلكو كامە ماڵی ئاییندارێكی توندیش بگرین لێوانلێوە لە پەیوەندی نوێ بە مەسرەفكردنی تەكنیك ڕێ وشوێنی هۆگربوون بە مۆدێرنەو بەرهەمەكانییەوە. تەنانەت خودی ئایینیش لەم فۆرمەدا دۆخ و سروتی ڕۆحی ترادیسێۆنی لە دەست دەدات و پەیوەندییەكی دیكەی ڕۆحی بە كەسرەفكردنی (باشتر)ەوە دەبەستێت، باشترو ڕەفاهیتر كە سەر بە كولتورێكی مەسرەفخوازە.

‎چیتر خێرو سەدەقات و چاكەكاری بەو شێوەیە ناڕوات بە ڕێوە لە نیوەشەوێكی ئەنگوستەچاودا لە بەر دەرگاكە دایبنێیت و بڕۆیت، چیتر چاكەو چاكەخوازی ئەوە نییە دەستی ڕاستت بیكات و دەستی چەپت پێی نەزانێت، بەڵكو دێتە دەرەوەو دەبێت لە دەرەوە ببینرێت و پێبزانرێت و مەسرەف بكرێت لە دەرەوەدا.

‎باڵاپۆشیی ئافرەتێكی ئایینداری نوێ لە ناو مۆدی باو و مۆدی بازاڕی لەچك و جل و بەرگدا، وە هاوتەریبوون لە گەڵ شێوازێكی جل و بەرگ و خۆداپۆشینی خوازراوی ناو هێزی مۆدە، سەر بە كولتوری مەسرەفگەرایە نەك داپۆشینی جەستەیەكی حەرام. ( كە مەولانا دێتە ناو فەزای مەجازیی و ڤێرتوالەوە، تۆ سەرقاڵی مەسرەفكردنی مەولانایت لە دەرەوەدا) كە خوداو ئایین و سروت و دەقی ئایینی دێنیتە ژێر باری (لایك) تۆ سەرقاڵی مەسرەفكردنی.


نوێترین

© 2016 Dwryan.net. All Rights Reserved.
Developed by Avesta Group and powered by Microsoft Azure