سەرەتا/ لەبارەی دابڕان/ پەیوەندی/

ڕۆژی چوارشەممە فێستیڤاڵی گەلاوێژ دەست بە چالاکییەکانی دەکات: زانیارییەکان بخوێنەوە

22/05/2022


 

بەهۆى یادى ٢٥ ساڵەى فێستییڤاڵى گەلاوێژەوە، بنکەى ڕووناکبیریی گەلاوێژ گەورەترین چالاکى ڕووناکبیریی و ئەدەبی خۆى ئەنجام دەدەات. یوبیلی زیوینی فێستیڤاڵی نێودەوڵەتی گەلاوێژ لە ٢٥ی٥ی٢٠٢٢ لە تەلاری هونەر دەست پێدەکات. 

 

فێستیڤاڵی گەلاوێژ بۆنەیەکی ساڵانەی کلتووریی ئەدەبی و ڕووناکبیرییە کە لە کوردستان لە شاری سلێمانی لەلایەن بنکەی ڕوناکبیری گەلاوێژەوە سازدەدرێت. بنکەی ڕووناکبیری گەلاوێژ ڕێکخراوێکی ڕووناکبیری گشتییە بایەخ بە ئەدەب و فیکر و کلتوری رۆشنگەری دەدات، بنکەیەکی تایبەتە بە کارو چالاکی ئەدەبی و ڕووناکبیری و لەپێناو ئەم فێستیڤاڵە ئەدەبی و ڕوناکبیرییەدا لەساڵی ١٩٩٦ دا لەلایەن چەند نووسەر و هونەرمەندێکەوە دامەزراوە.

 

فێستیڤاڵی گەلاوێژ وەک چالاکییەکی ئەدەبی و هونەری هەوڵێک بووە بۆ لەباربردنی کاریگەرییەکانی ئەو بارودۆخە سەخت و ناهەموارەی کە لەو کاتەدا کۆمەڵگەی باشووری کوردستان بە گشتی و توێژی نووسەران و ڕۆشنبیران و هونەرمەندان بەتایبەتی، بەهۆی شەڕی ناوخۆوە تێیدا ژیاون.

 

یەکەمین چالاکییەکانی فێستیڤاڵی گەلاوێژ لە ڕۆژگارێکدا سازدران، کە جەنگ و شەڕی براکان باڵیان بەسەر دوونیای سیاسی و کلتوری کۆمەڵگای کوردیدا گرتبوو. نووسەران بەسەر دوو بەرە و دوو شاردا دابەش بوو بوون و تا دەهات، جیاوازییە ئاینی و سیاسی و تایفییەکان تۆختر دەکرانەوە. سازدانی فێستیڤاڵی گەلاوێژ لەو ڕۆژانەدا، بروسکە و هەوڵێکی شادی بەخشی جیاوازبوو بۆ دەرچوون لە پاشماوەی ئەو تاریکییە زۆرەی شەڕی براکان دروستیان کردبوو!

 

"فێستیڤاڵی نێودەوڵەتی گەلاوێژ" لە مێژووی بیست و پێنج ساڵەی کارکردنیدا زیاد لە چەندین کتێب و گۆڤاری ئەدەبی بەهەردوو زمانی کوردی و عەرەبی لە فێستیڤاڵەکاندا چاپ و بڵاوکردووەتەوە.

 

ساڵانە پێشبڕکێیەک لەنێوان نووسەرانی "شیعر و چیرۆک و لێکۆڵینەوە"دا ڕێکدەخات و خەڵاتی تایبەت بە نووسەرانی بەشداربوو لە بوارەکانی "شیعر و چیرۆک و لێکۆڵینەوە" دەبەخشێت و هاوکات خەڵاتی ڕێزلێنان بەسەر کۆمەڵێک نووسەر و ڕۆشنبیری ناو بوارەکەدا دابەشدەکات.

 

فێستیڤاڵی نێو دەوڵەتی گەلاوێژ وەک پردی پەیوەندی نێوان کلتورە جیاوازەکان ساڵانە میوانداری نووسەران و بیرمەندانی وڵاتانی جیهان دەکات و تیایدا دیبەیت لەنێوان نووسەران و هونەرمەنداندا لەسەر پرسە فکری و ئەدەبییەکان سازدەدات. ئەمساڵ فێستیڤاڵی نێودەوڵەتی گەلاوێژ پێدەنێتە خولی بیست و پێنج ساڵەی بەردەوامییەوە و لەناو یوبیلی زیویندا کارەکانی ئەنجام دەدات و وابڕیارە، چالاکییەکانی فراوانتر و دەوڵەمەندتر بکات.

 

 

خەڵاتەکانی فێستیڤاڵی نێودەوڵەتی گەلاوێژ

 

لێکۆڵینەوەی ئەدەبی: گەلاوێژ لێکۆڵینەوە ئەدەبی لەبیرنەکردوە ساڵانە سێ خەڵات تایبەت بە لێکۆڵینەوە ئەدەبی پێشکەش دەکرێت.

 

خەڵاتی چیرۆک: چیرۆکەکان بەشێکی گرنگن لە فێستیڤاڵی نێودەوڵەتی گەلاوێژ ساڵانە سێ چیرۆکی نایاب پێشکەش دەکرێت.

 

خەڵاتی شیعر: هەموو ساڵێک سێ خەڵاتی شیعری پێشکەش بە داهێنەرانی شیعر دەکرێت.

 

چالاکییەکانی ئەمساڵی فێستیڤاڵ

 

یەکەم ڕۆژى فێستیڤاڵ گەورەترین چالاکى هونەرى لەخۆدەگرێت بە بەشدارى چەندین هونەرمەند و گروپی میوزیکى دیار. شەهرامی نازرى یەکێک دەبێت لەو هونەرمەندانەى لە کارێکی هونەریی گەورەدا لە یوبیلی زیوینی فێستیڤاڵی نێودەوڵەتی گەلاوێژ لە سلێمانی ئامادە دەبێت. هەروەها، بەشی میوزیکی کۆلێجی هونەرەجوانەکانی زانکۆی سلێمانی چالاکی میوزیکی خۆیان دەبێت، و هونەرمەند هەژار زەهاویش یەکێکی تر دەبێت لە بەشداربووان. لە‌ یوبیلی زیوینی فێستیڤاڵی گە‌لاوێژدا سێ ھونە‌رمە‌ندی دیارو بە‌ئە‌زموونی كورد خە‌ڵات دە‌كرێن.

 

گەورەترین پێشانگای شێوەكاری لەیۆبیلی زیوینی فێستیڤاڵی گەلاوێژدا دەكرێتەوە. لەدەستپێكی چالاكییەكانی (25)هەمین فێستیڤاڵی نێودەوڵەتی گەلاوێژدا، كە ئەمساڵ "یوبیلی زیوین"ە، پێشانگایەكی شێوەكاری هاوبەش بۆ نزیكەی 150 هونەرمەند دەكرێتەوە.

 

لەپێشانگاكەدا كە بڕیارە پێشنیوەڕۆی ڕۆژی 25-5-2022 لەناو كارگەی جگەرە شاری سلێمانی بكرێتەوە، هونەرمەندانی كوردو عەرەب و توركمان بە(تابلۆ، پەیكەر، سیرامیك) بەشداری تیا دەكەن، كە زیاتر لە (20) لەو هونەرمەندانە خاوەن بڕوانامەی دكتۆران و بەشێكیشیان ڕەخنەگرێكی دیاری بواری هونەری شێوەكارین. هەروەك بڕیاریشە پێشانگاكە بەدرێژایی ڕۆژانی فێستیڤاڵ بەردەوام بێت.

 

‎پێشانگەی كتێب یەكێك لە تایبەتمەندییە هەمیشەییەكانی فێستیڤاڵی نێودەوڵەتی گەلاوێژ بووە. ئەمساڵ چاوەڕوانی پێشانگایەكی گەورەتر و فراوانتربن. لە 25-5-2022 و بۆ ماوەى ٦ ڕۆژ بەردەوام دەبێت لە  كارگە‌ی جگە‌رە‌ی سلێمانی. هەروەها، لە ڕۆژى هەینیدا شانۆگەرى ماڵی خۆشەویستی دەست بە نمایش دەکات.

 

 

 

 

 

نوێترین


کاریکاتێر

وێنەهەواڵ

© 2016 Dwryan.net. All Rights Reserved.