سەرەتا/ لەبارەی دابڕان/ پەیوەندی/

ژن كوشتن

پێش 2 هەفتە



پەیمان عیزەدین

ژن كوشتن پەیوەندی بە بیركردنەوە و كەلتورێكەوە هەیە كە سەدان ساڵە ڕەگی داكوتاوە، لەو كەلتورو بیركردنەوەیەدا ژن مرۆڤێكی كامڵی خاوەن بڕیار نیە ئەگەر گەیشتبێتە بەرزترین ئاستی خوێندەواری یا سیاسی و ئیداری، ژن لە ناو خێزان و شوێنی كار و تەنانەت حیزبەكەشیدا هەمان ئەو تێڕوانینەی لەسەرە كە سەدان ساڵە چەقی بەستوە، ژن ئامڕازێكە بۆ خۆشكردنی ژیان، باشكردنی ژیان ئەركی ئەو نیە و پێویست ناكا خۆێ تێهەڵقورتێنێ.

لە كۆمەڵگای ئێمە و زۆرێك لە كۆمەڵگاكانی دەوروبەریشماندا ژن ئەو بەشەی خێزان و خێڵ و عەشرەت پێك ئەهێنێت كە ڕاستەوخۆ پەیوەندی بەشەرەفەوە هەیە، بۆیە هەر لادان و سەركێشیەك كە ببێتە هۆی لەكەداركردنی ئەو شەرەفە ،هەق لای نێرینەكانی خێزانەكەیەتی ڕایگرن بەهەر شێوازێك كە بەشایستەی لادانەكەی بزانن.

 كەواتە ئەسڵی كێشەكە تێكەڵەیەكی كەلتوری، قانونی، زهنیە كە ژنی كردۆتە بونەوەرێك خاوەنی خۆی نیە و توانای بڕیاردانی لەسەر ژیان و هەڵسوكەوتی خۆی نیە.

لێرەوە ڕێگرتن لە كوشتنیان، لە لێدان و سوكایەتی پێكردنیان بە دەستگیركردن و سزادانی بكوژانیان نابێ، ڕێگرتن لەو دۆخە خراپەی بەسەر ژناندا دێ لە گۆڕینی هۆكار و تێڕوانینەكانی بەكەم سەیركردنی ژنانە، چارەسەری بنەڕەتی لە گۆڕینی كەلتوردایە، ئەمەش بە چاوسوركردنەوە و دروشمی ناوبەناوی بەرپرسان نابێ.

ئەبێت بنەماكانی عەدالەت و یەكسانی بەر لە هەرشتێك لە پەروەردە و پڕۆگرامی خوێندندا ڕەنگ بداتەوە تا بتوانرێت لە داهاتودا نەوەیەك پێبگەیەنرێ كەبوو بە پارێزەر یا دادوەر وابیرنەكاتەوە ئەگەر ژن لە دابونەریت دەرچوو هەقی كوشتنی هەیە، ئەگەر پۆلیس بو چاوپۆشی نەكات لەدەستگیركردنی تۆمەتبارێك لەبەرئەوەی ژنەكە بە بێڕەوشت ئەزانێ، كە ئەبێتە مامۆستا گاڵتە بە هاوڕێیەتی كوڕو كچ نەكا و بۆ سزادان كوڕەكان نەخاتە لای كچەكانەوە، ئەگەریش بوو بە مامۆستای ئاینی هەموو توانای نەخاتە گەڕ بۆ پەخشكردنەوەی توندوتیژی.

هاوشان لەگەڵ  پەروەردەدا، ئەم دەسەڵاتە ڕابوەستێ لە ئاودانی ڕۆحی عەشیرەتگەری، تا دیوەخانەكان بە پارەی حیزب و لە بودجەی گشتی ئاوەدان بن، ئەو كەلتور و تێڕوانینە نێرسالاریەی هەیە تۆختر و قایمتر ئەبێ.

لەگەڵ ئەمانەشدا دەقە سزاییەكان بۆ كوشتنی ژن و ئازاردان و سوكایەتی پێكردنی هێندە قورس بكرێن كە ببنە بەربەستێكی تۆكمە لەبەردەم ئەم نەوەیەی ئێستا كە سی ساڵە ڕق و توندوتیژی تیا پەروەردە و گەورە ئەكرێ.

ئەگەر بەمجۆرە دەست نەدرێتە گۆڕانكاری ڕاستیی، ئەوەی ئێستا حكومەتی هەرێم و زۆرێك لە ڕێكخراوەكان ئەیكەن لە ڕۆڵی مردو شۆر تێپەڕناكات كە دوای مردنی كەسەكە ئامادەیە بۆ شتن و كفنكردنی.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.