سەرەتا/ لەبارەی دابڕان/ پەیوەندی/

بۆچی قسە لەسەر ئاینی خەڵك ئەكەن؟

پێش 2 هەفتە


سامان رەشید

ئەمە پرسیارێكە زۆرجار لەو كەسانە دەكرێت كە ڕەخنە لە ئیسلام یان ئیسلامی و مەلاكان دەگرن. 

من لە بیرمە هەتا ساڵانی نەوەدەكان و پێش بەهێزبوونی ئیسلامی سیاسی و سەلەفییەكان، كە بەكەسێك دەوترا ئیماندار و لە خواترس، مەبەست ئەوە بوو كەسێكی میهرەبان و دەست پاكە، كەسێك كە فڕوفێڵی نییە و هەموو كەس لە دەست و دەمی پارێزراوە، ئیمانی خەڵك ئەوكات ئیمانێكی ناوەكی بوو لەنێوان خۆی و خوادا، ئیمانێك بوو بۆ خۆت بوو، تەنانەت زۆر مەلاو حاجی هەبون كچەكانیان سەرپۆشیان نەدەكرد، یان كوڕەكانیان هەر نوێژیان نەدەكرد، بەڵام ئەوان فشیار لێ نەدەكردن و دەیانووت (لێیان گەڕێن گەنجن، كە گەورە بوون ئەگۆڕێن).  
ووتاری مەلاكان زیاتر باسی هاوكاری هەژاران و ڕێزگرتنی دایك و باوك و ئەم شتە كۆمەڵایەتییانە بوون. هەتا ئێرە هیچ كەسێك كێشەی لەگەڵ ئەم جۆرە ئیمانەدا نەبوەو كەسیش قسەی لەسەر نەكردوە. 

بەڵام لەدوای هاتنی ئیسلامی سیاسی و سەلەفییەكان، پێناسەی ئینسانی ئیماندار ڕێك پێچەوانە كرایەوە، لەو ئینسانە ئارام و دەست و دەم پاكەوە گۆڕا بۆ كەسێك كە هیچ كەس و لایەنێك پارێزراو نییە لە دەم و دەستی، كەسێك بە ڕیشێكی درێژ و شەڕواڵێكی كورتەوە شەو و ڕۆژ خەریكی ڕسواكردن و سوكایەتی كردنە بەوانی دیكە، ئێستە بە دەگمەن ووتاری مەلایەك دەبینی باسی خودی دینەكە و میهرەبانی ئیماندار بكات، بەڵكو هەمیشە ووتارەكان باسی ناشیرینی ئەوانی دیكە دەكات، لەئێستەدا ئەم بونەوەرە هەمووشتەكانی دەرەوەی خۆی ڕەت دەكاتەوەو هیچ شتێك نەماوە پەلاماری نەدات، سەیری حاڵی ئێزیدیەكان و زەردەشتییەكان و ژنانی سفور و شانۆكاران و نوسەران و عەلمانییەت و  وولاتانی ڕۆژئاواو هەموو شتەكانی دیكە بكەن لە دەمی ئەم بونەوەرانەوە، تەنانەت بوون بە كێشە بۆ خودی خۆشیان و ڕۆژانە مەلاو گروپی جیاوازی ئیسلامی پەلاماری یەكتر دەدەن!
 
ئیسلامییەكان ئاینیان لە بابەتێكی تاكە كەسی نێوان مرۆڤ و خوداوە گۆڕی بۆ ئاینێكی بە كۆمەڵ و نمایشكەر لە دژی ئەوانی دیكە! سەیری ئەو چالاكییانە بكەن كە ڕۆژانە ئەنجامی دەدەن، زۆر گرنگی بە ژمارە زۆری دەدەن، زۆر گرنگی بە ڕووكەش و دەرخستنی چالاكییەكان دەدەن، ئەم چالاكییانەش بۆ خۆیان نییە، بەڵكو بۆ ئیستفزازكردنی ئەوانی دیكەیە! 

كۆمەلێك كچ كۆ دەكەنەوەو تورەكەیەك دەكەن بە سەریاندا كە لە توركیا هێناویانە، ناویان دەنێن تاجی زێڕین و داوێن پاكی! ئەمە ڕێك شەڕە لەگەڵ ئەوانەی كە حیجاب ناكەن و بە مانای داوێن پیسی ناحیجابەكان دێت! 

یان نوێژێكی بە جەماعی دەكەن و وێنەی دەگرن، دواتر بڵاوی دەكەنەوەو دەڵێن با دڵی هەموو دووژمنانی ئیسلام بتەقێت! ئێوە ئیمانداری بۆ خۆتان دەكەن دەیان لە دژی خەڵك دەیكەن!
 
ئەم تێگەشتنە نوێیە بۆ ئاین تەنها لەلای ئیسلامییەكان نەماوەو بووە بە تێگەشتنێكی گشتی لە نێوان هەموو خەڵكدا، تەنانەت ئەو كەسانەشی كە هەرگیز ئیسلامی و سەلەفی نەبوون، بە خۆیان بزانن یان نەزانن، هەمان عەقڵیەت و كەلتوری ئەوانیان وەرگرتوەو كاری پێدەكەن!

ئێستە لە زیهنییەتی هەموو موسوڵمانێدا ئیسلام ئاینێك نییە مومارەسەی بكات و بە تەنیشت ئەوانی دیكەوە بژی، نەخێر ، پێیان وایە ئیسلام ئاینێكە بەردەوام لە شەڕدایە لەگەڵ ئەوانی دیكەدا، دەبێت ڕۆژێك بێت ئەوانی دیكە قوت بدات، هەر بۆیە بەردەوام دەڵین( سەركەوتن هەر بۆ ئیسلامە)!

ئەم جۆرە ئیمانەی كە ئیسلامی سیاسی و سەلەفی هێناویانە، وەك حوتێك وایە لە ناو دەریایەكدا و شوێن هەموو ووردە ماسییەكانی دیكە كەوتبێت و بییەوێت قوتیان بدات، ئەوانەشی كە ئێستە قسە لەسەر ئاین دەكەن، هیچ كێشەیەكیان لەگەڵ ئەو ئیسلامە كۆنەدا نییەو ئەسڵەن قسەكردن لەسەر شتێكی ئاوا جۆرێكە لە نەخۆشی، بەڵكو كێشەكە لەگەڵ ئیسلامی سیاسیدایە.

ئەو ئاینەی ئێستە لە ووڵاتانی ئەوروپا هەیە، لە جۆری یەكەمە، ئاینێكە بۆ خودی خۆت، نەك بۆ بانگەشەكردن، ئینسانە ئیماندارەكانی ئێرە میهرەبانترین جۆری مرۆڤەكانن، هەموو هەوڵی خۆیان دەدەن بۆ هاوكاری خەڵكی هەژارو پەنابەران، بۆیە هەموو كەس ڕێزیان دەگرێت و كەس قسەیان لەسەر ناكات، بەڵام كاتێك كە تۆ پەلاماری هەموو لایەك بدەیت، خەلكیش مافی خۆیەتی هاوار بكات !
 
باوەڕم وایە ئیسلامی سیاسی وەك ژەهر وایەو دەبێت خەڵك منداڵی خۆی لێیان بپارێزێت، ئەم فیتنیە سنوری بۆ دانەنرێت لە داهاتوودا دەبێتە شەڕی هەموان لە دژی هەموان!

نوێترین


کاریکاتێر

وێنەهەواڵ

© 2016 Dwryan.net. All Rights Reserved.