سەرەتا/ لەبارەی دابڕان/ پەیوەندی/

بۆ یەكەمجار لە كوەیت ژنان ڕێگەیان پێدەدرێت پەیوەندی بە سوپاوە بكەن

4 رۆژ پێش ئێستا


بۆ یەكەمجار لە مێژووی كوەیت ئەو وڵاتە بڕیاریدا ژنان ڕێگەیان پێبدرێت پەیوەندی بە سوپاوە بكەن، دوای ئەوەی بە درێژایی ساڵانی ڕابردوو كاری فەرمانبەری ژنان تەنها لە بواری مەدەنیدا ڕێگەی پێدەدرا.

 

سوپای كوەیت لە تویتەری فەرمی خۆی بڵاویكردەوە، حەمەد جابر ئەسوباح، جێگری سەرۆكی ئەنجومەنی وەزیران و وەزیری بەرگری كوەیت بڕیارێكی سەبارەت بە ژنانی كوەیت بەمەبەستی پەیوەندیكردنیان بە سوپای وڵاتەوە دەركردووە، ئەویش لەبوارەكانی خزمەتگوزاری و پشتیوانی و پزیشكیدا.

 

ئێستا ژنانی كوەیت هەلی ئەوەیان هەیە بچنە ریزی سوپاوە 

لەوبارەیەوە وەزیری بەرگری كوەیت بە ئاژانسی هەواڵی كوەیتی وتووە: "ئێستا ژنانی كوەیت هەلی ئەوەیان هەیە بچنە ریزی سوپاوە و لەگەڵ براكانیان بەشداری خزمەتی سەربازی بكەن".

 

وتیشی:"ئەو بڕیارە لەبەرپرسیارێتی بەرامبەر پاراستنی كوەیتەوە سەرچاوەی گرتووە كە وڵات بپارێزین لە هەڕەشەی دەرەكی و ئارامی و ئاسایش فەراهەم بكەین".

 

ئەلسوباح متمانەی خۆی بە توانای ژنانی كوەیت و ئامادەییان بۆ كاركردن لە سوپا دەربڕی كە ئەو بەرپرسیارێتییە بەجێ دەگەیەنن.

 

كوەیت یەكەم دەوڵەتی كەنداو بوو كە بەپێی سیستەمی پەرلەمانی 1962 مافی دەنگدانی بەخشیە ژنان

كوەیت یەكەم دەوڵەتی كەنداو بوو كە بەپێی سیستەمی پەرلەمانی 1962 مافی دەنگدانی بەخشیە ژنان و لە ساڵی 2005 یش رێگەی پێدان خۆیان كاندید بكەن.

 

وەزیری بەرگری كوەیت بە رۆژنامەی قەبەسی وتووە: هەنگاوی داهاتوو چەند لیژنەیەك پێكدەهێنرێن بۆ چۆنیەتی پەیوەندیكردنی ژنان بە سوپا و ئەو ئەركەی پێیان دەسپێردرێت.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.