سەرەتا/ لەبارەی دابڕان/ پەیوەندی/

ڕێوڕەسمی مردوو سوتاندن لەلای هیندۆسەكان
بۆچی ڕێگە بە ژنانی شوێنكەوتووی ئەو ئاینە نادرێت بەشداری تێدا بكەن؟

25/07/2021


تایبەت بە دابڕان

 

بۆیەكەمجاربوو وێنەی ماندێرا بیدی كچە ئەكتەرێكی هیندی كە بێژەری تەلەفزیۆنیشە بڵاوبوویەوە كە بەشداری ڕێوڕەسمی سوتاندنی تەرمی هاوسەرەكەی كرد، ئەوەش بۆ یەكەمجارە لەو وڵاتە ڕووبدات و شكاندنی نەریتی سوتاندنی مردوو بوو لەلای هيندۆسەكان.

 

تائێستا لەلای هیندۆسەكان وا باو بووە كە پیاوان بەشداری ڕێوڕەسمی سوتاندنی مردووەكانیان دەكەن
تائێستا لەلای هیندۆسەكان وا باو بووە كە پیاوان بەشداری ڕێوڕەسمی سوتاندنی مردووەكانیان دەكەن، كە ئەوەش كەلتورێكی باوە لەلای هندۆسەكان و شوێنكەوتوویی زۆرێك لە ئاینەكانی دیكەی ئاسیا، بەڵام پرسیارەكە ئەوەیە ئەم بیركردنەوە و كەلتورە لەچییەوە سەرچاوە گرتووە؟
ڕۆژی 30/6/2021 راج كوشاڵ دەرهێنەری هیندی لە تەمەنی 49 ساڵیدا لە مۆمبای بە نۆرەی دڵ كۆچی دوایی كرد، تا ئێرە ڕووداوێكی ئاسایی بوو، بەڵام ئەوەی كە هاوسەرەكەی سەرپەرشتی ڕێوڕەسمی سوتاندنی تەرمەكەی كرد ئاسایی نەبوو، كاردانەوەی زۆری بەدوای خۆیدا هێنا، زۆرێك بە شكاندنی نەریتی باوی پیاوسالاری هیندۆسەكان لە ڕێوڕەسمی سوتاندنی مردووەكان ناویان برد، زۆرێكیش ڕەخنەیان لێگرت.

ماندێرا سەرپەرشتی ڕێوڕەسمی سوتاندنی تەرمی هاوسەرەكەی كرد
شوبها دی نوسەر و چالاكوانی هیندی لەوبارەیەوە نوسیویەتی "ماندێرای غەمگین كە سەرپەرشتی ڕێوڕەسمی سوتاندنی تەرمی هاوسەرەكەی كرد، نیشانیدا كە دەتوانێت بەرەنگاری داب و نەریتە كۆنەكان ببێتەوە كە چەندین دەیەیە حوكمی كۆمەڵگە دەكەن، وە پەیامێكی سۆزداری بەهێزیشە دژ بە سیستەمی باوك سالاری".
وەك ئەو نوسەرە نوسیویەتی "كاتێك مەشخەڵی سوتاندنی هاوسەرەكەی گرت بەدەستیەوە، گەرمی چووە دڵی ئەو ژن و پیاوانەی باوەڕیان بە خۆیان هەیە نەك بەو داب و نەریتانەی چەندین دەیەیە كۆمەڵگەكەیان بەڕێوەدەبات، هەروەها ئەو كەلتورەشی سوتاند كە ڕێگەی بە ژنان نەدەدا بەشداری ڕێوڕەسمی سوتاندنی مردووان بكەن".

بەهۆی زۆربوونی ژمارەی مردووان بە كۆرۆنا، بە ناچاری بەشێك لە ژنان بەشداری ڕێوڕەسمی سوتاندنی هاوسەرەكانیان دەكرد
بەمدواییە كە ڤایرۆسی كۆرۆنا لە هیند بەشێوەیەكی بەرچاو هەڵكشا، بەهۆی زۆربوونی ژمارەی مردووان بە كۆرۆنا، بە ناچاری بەشێك لە ژنان بەشداری  ڕێوڕەسمی سوتاندنی هاوسەرەكانیان دەكرد، بەڵام ئەو هەنگاوە وەك ناچارییەك دەبینرا و لەكاتی ئاساییدا جێی ڕەخنەی كەسانی شوێنكەوتووی ئەو ئاینە بوو.
ئێستاش زۆرێك لە هیندۆسەكان لە تۆڕە كۆمەڵایەتیەكان بە گاڵتەپێكردنەوە لە بەشداری ژنان لە ڕێوڕەسمی سوتاندنی تەرمی مردووان دەڕوانن، سوریشن لەسەر ئەوەی دەبێت پیاوێك ئەو كارە بكات، تەنانەت ئەگەر منداڵیش بێت تەنها لەڕەگەزی نێر بێـت دەگونجێت بەو مەرجەی تەمەنی لە سەروو 10 ساڵییەوە بێت، چونكە ئەوان پێیان وایە سەردانی ژنان بۆ شوێنی سوتاندنی تەرمەكانیش پێچەوانەی داب و نەریتی هیندۆسەكانە كە لەباب و باپیرانیانەوە بۆیان ماوەتەوە.

زانایانی ئاینی هیندۆس ڕەتیدەكەنەوە لە ئاینەكەیاندا دەقێك هەبێت كە ڕێگربێت لە بەشداری ژنان لە ڕێوڕەسمی سوتاندنی مردوواندا
هەرچەندە زانایانی ئاینی هیندۆس و كەسایەتیەكانی ئەو ئاینە ڕەتیدەكەنەوە لە ئاینەكەیاندا دەقێك هەبێت كە ڕێگربێت لە بەشداری ژنان لە ڕێوڕەسمی سوتاندنی مردوواندا، بەڵام شوێنكەوتوانی هیندۆس و تەنانەت بەكارهێنەرانی تۆڕە كۆمەڵایەتییەكان و لێكۆڵەرانی ئەو ئاینەش شتێكی دیكە دەڵێن، بەشێك لەهیندۆسەكان هۆكاری ڕەتكردنەوەی بەشداری ژنان لە ڕێوڕەسمی سوتاندنی مردووەكان بۆ ئەوە دەگێڕنەوە، كە ڕۆحی مردووەكان دەچێتە پرچی ئەو ژنانەی لە ڕێوڕەسمەكە بەشداری دەكەن، بۆیە ڕێگە نادرێت ژنان بەشداری بكەن.
بەڵام پرۆفیسۆر بەهاجوان دێت، لەوبارەیەوە باس لەوەدەكات، زۆر هۆكار هەن بۆ ڕێگریكردن لە ژنان كە بەشداری ڕێوڕەسمەكە بكەن، بەڵام لە بنەڕەتدا هۆكارەكە ئەوەیە لەئاینی هیندۆسیشدا زیاتر وا باوە ژنان كاری ماڵەوە بكەن و پیاوانیش كاری دەرەوە ئەنجام بدەن، بەڵام بۆ ئەوەی ڕێگری لە ژنان بكرێت پێویستە بەهانەیەكی ئاینی بهێندرێتەوە.

.

بەشێك لە هیندۆسەكان بەهانەی ئەوە دەهێننەوە، كە ژنان لەڕووی سۆزدارییەوە لاوازن...
بەشێك لە هیندۆسەكانیش بەهانەی ئەوە دەهێننەوە، كە ژنان لەڕووی سۆزدارییەوە لاوازن، بۆیە ئەگەر بەشداری ڕێوڕەسمی سوتاندنی مردووان بكەن كاریگەری لەسەر دەرونیان جێدەهێڵێت، ئەمە و دەیان بەهانەی دیكە لەنێو هیندۆسەكان باوە كە ڕێگری لە بەشداری ژنان لەو ڕێوڕەسمەدا بكات.

هیندۆس ئاینێكی زۆرینەیە لە هیند و نیپاڵ، بە سێیەم گەورەترین ئاینی سەرزەوی دادەنرێت
هیندۆس یاخود هیندۆكی، ئاینێكی زۆرینەیە لە هیند و نیپاڵ، مێژووی ئەو ئاینە دەگەڕێتەوە بۆ سەدەی 15 ی پێش زاین و تائێستاش بەردەوامە، تائێستاش ڕوون نییە دامەزرێنەر و پەیامهێنی سەرەكی ئەو ئاینە كێیە، بەڵام ئەوە ڕوون بووەتەوە كە لە ئاینی فیداوە سەرچاوەی گرتووە كە ئەویش ئاینێكی كۆنی هیندیەكانە و خاوەنی دەیان ئەفسانە و چەندین كتێبی ئاینییە، لەو كتێبە ئاینیانەی هیندۆسەكانیش بەناوبانگترینیان(فیدا، ئاپانیچاد، بوراناس، رامایانا) و زۆری تر، شوێنكەوتووانی ئەو ئاینە لەئێستادا نزیك بووەتەوە لە ملیارێك كەس كە زیاتر لە 890 ملیۆن كەسیان دانیشتووی هیندستانن، بەوەش دەردەكەوێت %96 ی هیندۆسەكان دانیشتووی ئەو وڵاتەن و ئەو ئاینەش بە سێیەم گەورەترین ئاینی سەرزەوی دادەنرێت دوای ئاینی مەسیحی و ئیسلام.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.