سەرەتا/ لەبارەی دابڕان/ پەیوەندی/

شێخی ئەزهەر: خەتەنەكردنی كچان كردەوەیەكی بەزیانەو نە لە قورئاندا هاتووەو نە لە سونەت

10/05/2021


وەرگێڕانی لە عەرەبییەوە:  بابان حەمە

جارێكی دیكە ماڵپەڕ و پەیج و تۆڕەكۆمەڵایەتییەكانی نزیك لە زانكۆی ئەزهەر، فەتواكەی دكتۆر ئەحمەد ئەلتەییب-ی شێخی ئەزهەریان سەبارەت بە خەتەنەكردنی كچان بڵاو كردەوە، ئەمەش پاش ئەوە دێت كە لەلایەن هەندێك دامەزراوەی ئاینیی و پزیشكییەوە شەپۆلێكی ناڕەزایی بەدوای خۆیدا هێنا، سەرباری لایەنگری و پشتیوانی هەندێكیان كە پشتیوانی فەتواكەی شێخی ئەزهەر بوون.

د.ئەحمەد ئەلتەییب-ی شێخە گەورەی ئەزهەر، سەبارەت بە خەتەنەكردنی كچان، بە فەتواو یەكلاكردنەوەی حوكمێكی شەرعی روونی دەكاتەوە:  دامەزراوەی ئەزهەر لەژێر رۆشنایی و گەڕانەوە بۆ ئەهلی فیقهو زانستی پزیشكی نوێ و ئەو داتاو زانیارییە كۆكراوانەی لەبەردەستیاندایە، بۆیان روون و یەكلا بۆتەوە كە خەتەنەكردنی كچان زیانی ئێجگار گەورەی هەیەو شوێنەوارێكی زۆر خراپ لەسەر ژیانی هاوسەری كەسی خەتەنەكراو جێدەهێڵێت و ئەو شوێنەوارە خراپانەش بەسەر كۆی كۆمەڵدا ڕەنگ دەداتەوە.
ئاشكراشی دەكات:  كۆمەڵی توێژەرانی ئیسلامی لە ئەزهەر، پاش دراسەكردنی وورد لەسەر بابەتی خەتەكردنی كچان لە هەموو لایەنە فیقهییە دروستەكانەوە، كۆی ئەندامانی ئەو كۆمەڵە گەیشتنە ئەو بڕوایەی كە بابەتی خەتەنەكردنی كچان بەشێك نییە لە بابەتە شەرعییە دروست و جێگیرەكان و نە لە قورئاندا جێگەی باسە و نە لە سونەتیشدا.

رونیشی دەكاتەوە كە كردەی خەتەنەكردنی كچان تەنهاو تەنها دیاردەیەكە لە دەرەوەی تێگەیشتنی راست و دروست لە ئاین،  زەرەرو زیان و لایەنی خراپی تەندروستییەكەشی لەسەر كچان لەم ماوەیەی دواییدا دەركەوت، هاوكات لەگەڵیشیدا كۆمەڵی مرۆیی لەدەست ئەو دیاردەیە بێزاربوون.
شێخی ئەزهەر باس لەوەش دەكات كە جێگیربوونی دیدو بۆچوونە شەرعیی و پزیشكییەكان لەسەر زیان و خراپەكانی دیاردەی خەتەنەكردنی كچان، هاوكات نەبوونی هیچ بەڵگەو پشتیوانییەكی راست و دروست، وادەكات ئەم دیاردەیە قەدەغە بكرێت یان دیاریكردنی سزا بۆ ئەنجامدانی ئەو كردەوەیە، ببێتە بابەتێكی شەرعی و ڕەوا.
لای خۆشیەوە (دار الإفتا‌و المصریە) لە پێگەی رەسمی خۆیدا فەتوایەكی یەكلاییكەرەوە بۆ دیاردەی خەتەنەكردنی كچان بڵاو دەكاتەوەو ئاشكرای دەكات كە خەتەنەكردنی كچان دیاردەیەكە وەك خوو و نەریتێكی پێشینەی گەلانی رابردوو ماوەتەوەو هیچ پەیوەندییەكی بە ئاینەوە نییە، دەریشكەوتووە كە زیان و مەترسییە تەندروستی و دەروونییەكانی ئێجگار گەورەن و حەرامكردنی ئەو دیاردەیە راست و ڕەوایە.

(دار الإفتا‌ء المصریە) لەو فەتوایەیدا رونیشی دەكاتەوە كە گفتوگۆ و حەدیسی (أم عطیە)ی تایبەت بە خەتەنەكردنی كچان، زۆر لاواز و هەڵبەستراوەو پەیامبەری ئیسلام بەهیچ شێوەیەك كچەكانی خۆی خەتەنە نەكردووە.

ئەو پێگەیە مەترسی ئەوەش دەخاتە بەرباس كە هەندێك لایەنی نا پسپۆڕ و نا شەرعی و نا زانستی و دوور لە زانستە پزیشكییەكان، ئەم بابەتەیان وا لێكردووە كردویانەتە فەرز و ئەژماری خواپەرستی!

پێگەكە پێ لەسەر ئەوە دادەگرێت كە حەرامكردنی دیاردەی خەتەنەی كچان و قەدەغەكردنی ئەو دیاردەیە كردار و گوفتارە راست و دروستەكەیە.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.