سەرەتا/ لەبارەی دابڕان/ پەیوەندی/

كێشەی ئەوقاف و مامۆستایەكی ئایینی مزگەوتێكی داخست

پێش 1 هەفتە


بە بڕیارێكی وەزارەتی ئەوقافی هەرێمی كوردستان، سالار چۆمانی، پێشنوێژ و وتارخوێنی مزگەوتی ئیمان لە چۆمان گواستراوەتەوە گوندی رەزان سەر بە شارۆچكەی گەڵاڵەی قەزای چۆمان، مامۆستا ئایینییەكە دەڵێت"حكومەت زوڵمم لێدەكات و نایەڵێت لە پێشنوێژ و وتاردان بەردەوام بم".
 
رۆژی هەینی رابردوو نوێژخوێنانی مزگەوتەكە چونەتە بەردەم لقی 26ی گوڵانی پارتی دیموكراتی كوردستان و قایمقامیەتی قەزای چۆمان، داوایان كردوە سالار چۆمانی نەگوازنەوە مزگەوتێكی دیكە، شەوی دواتریش بۆ نوێژی تەراویح  نوێژخوێنان چونەتە مزگەوتەكە، بەڵام كەس نەبوە پێشنوێژیان بۆ بكات، "چونكە مزگەوتەكە داخراوە."
 
سالار چۆمانی، پێشنوێژ و وتارخوێنی مزگەوتی ئیمان لە چۆمان رایگەیاند، "حكومەتی هەرێمی كوردستان و وەزارەتی ئەوقاف زوڵمم لێدەكەن" و بڕیارەكەش بە "سزایەكی ناڕەوا" پێناسە دەكات.
 
ئەو مامۆستا ئایینییە دەشڵێت"وەزیری ئەوقاف ناتوانێت مامۆستایەكی دیكەی ئایینی بێنێتە شوێنی من، چونكە خۆم لەڕێگەی خێرخوازانەوە مزگەوتەكەم دروستكردوە".
 
ئەو مامۆستا ئایینییە پێیوایە هۆكاری سزادانەكەی "لەسەر چەند قسەیەكی حەق بوە" كە لە وتاری دو هەفتەی رابردو بە نوێژخوێنانی وتوە"لە هەرێمی كوردستان تیڤییەكان بەرنامەی بێ بنەما و نا شەرعی پەخشدەكەن و حكومەتیش رێگەیان پێدەدات".
 
یوست ئەحمەد تێبینەری تێبینەرایەتیی ئەوقافی چۆمان رایگەیاند "بڕیارەكە سزا نییە و گواستنەوەی مامۆستایەكی ئایینییە لە مزگەوتێك بۆ مزگەوتێكی دیكەی هەمان سنور و دەبێت پێیەوە پابەندبێت". 
 
لەبارەی هۆكاری گواستەنەوەی ئەو مامۆستا ئایینییە، یوست ئەحمەد دەڵێت"ئەو مامۆستایە بڕیاری ژوری ئۆپەراسیۆنەكانی هەرێمی كوردستانی جێبەجێ نەكردوە، چونكە ئەو كاتەی بڕیاردرا دەرگەی مزگەوتەكان دابخرێن سالار چۆمانی پێیەوە پابەند نەبوە و وتاری رۆژی هەینی داوە".
 
تێبینەری ئەوقافی چۆمان رونیدەكاتەوە، تەواوی مزگەوتەكان سەر بە وەزارەتی ئەوقاف و كاروباری ئایینیین و ئەوان دەتوانن كام فەرمانبەریان پێشنوێژ و وتار خوێنی مزگەوتەكە بێت، ئاماژە بەوەش دەكات"مزگەوتی ئیمان پێشنوێژێكی دیكە فەرمانبەریانە و ئەو راسپێردراوە لە شوێنی سالار چۆمانی نوێژ بۆ نوێژخوێنانی سنوری مزگەوتەكە بكات".
 
لقی 26ی گوڵانی پارتی دیموكراتی كوردستانیش لەسەر هاتنی خەڵك بۆ بەردەم لقەكەیان و دورخستنەوەی ئەو مامۆستا ئایینییە رونكردنەوەیەكی بڵاوكردوەتەوە و دەڵێت"ئەو ئیجرائاتەی وەزارەتی ئەوقاف و كاروباری ئایینی بەرامبەر مامۆستا سالار كردویەتی، دور و نزیك پەیوەندی بە ئێمەوە نییە، بنەماڵەی مامۆستا سالار چۆمانی بنەماڵەی حاجی ئاغای كۆسرەتانن نیشتیمانپەروەر و دڵسۆزن و خۆیان خاوەنی رێبازی پارتی و بارزانین، با كەس نان و پیاز بەو بابەتەوە نەخوات".
سەرچاوە/ روداو

نوێترین


کاریکاتێر

وێنەهەواڵ

© 2016 Dwryan.net. All Rights Reserved.