سەرەتا/ لەبارەی دابڕان/ پەیوەندی/

ئایین كێشەی بۆ تێكەڵبونی موسڵمانانی ئەڵمانیا بە كۆمەڵگە دروست نەكردوە

پێش 1 هەفتە


لێكۆڵینەوەیەكی نوێ دەریدەخات، ژمارەی موسڵمانان لە ئەڵمانیا بەشێوەیەكی بەرچاو لە ساڵی 2015وە زیادیكردوە، راستە ژمارەیەكیان لە دۆزینەوەی كاردا روبەڕوی ئاڵنگاری بونەتەوە، بەڵام بەگشتی ئایین ئاستەنگی بۆ تێكەڵبونیان دروستنەكردوە.
 
بەپێی لێكۆڵینەوەیەكی ئۆفیسی فیدراڵیی ئەڵمانیا بۆ كۆچ و پەنابەران، 5.3 بۆ 5.6 ملیۆن موسڵمان لە ئەڵمانیا دەژین و بەو جۆرەش بێت لە ساڵی 2015وە ژمارەیان نزیكەی 900 هەزار كەس زیادیكردوە، موسڵمانان رێژەی 6.4 بۆ 6.7%ی دانیشتوانی ئەڵمانیا پێكدەهێنن.
 
لێكۆڵینەوەكە دەریدەخات، زۆربەی موسڵمانانی ئەڵمانیا بە رەچەڵەك خەڵكی توركیان و زۆربەی پەنابەرانی موسڵمانی نیشتەجێی ئەو وڵاتەش كە لەدوای ساڵی 2015وە چونەتە ئەڵمانیا، خەڵكی سوریا و عێراقن.
 
ئەو لێكۆڵینەوەیە لە ساڵانی 2019 و 2020دا كراوە و تێیدا بەراوردێك كراوە لەنێوان پەنابەرانی موسڵمان و پەنابەرانی كریستیان، لەگەڵ ئەوانەی هیچ ئینتیمایەكی ئاینییان نییە و تێیدا دەردەكەوێت، زۆركات ئایین فاكتەرێكی یەكلاییكەرەوە نییە لای ئاراستە جیاوازەكان بۆ تێكەڵبونیان لەو كۆمەڵگەیە، بۆ نمونە، 15.8% پەنابەرانی موسڵمان و 17.5% كریستیانەكان خوێندنیان تەواونەكردوە، بەگشتی پەنابەرانیش 15.3%ی خوێندنیان تەواونەكردوە، ئەمەش دەریدەخات موسڵمانان زۆر جیاواز نین لەگەڵ پەنابەرانی دیكەدا.
 
هەندێك لە پەنابەرە موسڵمانەكان و ئەوانەی موسڵمانیش نین، بەپێی لێكۆڵینەوەكە، روبەڕوی ئاڵنگاری دەبنەوە، كە ئەڵمانییەكان روبەڕویان نابنەوە، وەكو دەستكەوتنی كار، ئەنجامی لێكۆڵینەوەكەش دەریدەخات، زۆربەی موسڵمانان لەگەڵ كۆمەڵگەی ئەڵمانی تێكەڵن.
 
هەروەها لێكۆڵینەوەكە ئاماژەی بەوەشكردوە،  70%ی ژنانی موسڵمان باڵاپۆش نین و دابەشبونیشیان لەو بوارەدا لەسەر بنچینەی تەمەن بەم جۆرەیە: 62%ی ئەوانەی تەمەنیان 65 ساڵی تێپەڕاندوە باڵاپۆشن، لەكاتێكدا ئەوانەی تەمەنیان لەنێوان 16 بۆ 28 ساڵاندایە، تەنیا 26%یان باڵاپۆشن.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.