سەرەتا/ لەبارەی دابڕان/ پەیوەندی/

پەروەردەی داعشەكان

پێش 1 هەفتە



حەسەن یاسین

پێشتر چەند جارێك جەختمان لەوە كردۆتەوە، كە داعش، سەرەڕای تێكشكانی سەربازی و لەدەستدانی پانتاییەكی بەرفراوانی جوگرافی و نەمانی خەلافەتەكەی، بەڵام هەر ماوە و چەكدارەكانی، لێرەو لەوێ، هەر بەردەوامن لەسەر چالاكییە تیرۆریستییەكانیان و شانە نوستووەكانیشیان، چ لەنێو پانتایی دنیای ئەلیكترۆنی بێت، یان لەسەر زەمینی واقیع و بەردەوامن لەسەر هەوڵدان بۆ راكێشانی ئەوانەی دەتوانن بەرەو بیری توندڕەوی و ئەندامێتی لە رێكخراوەكەیان رایبكێشن!.

لایەنێكی تری داعش، كە كەمتر ئاماژەی بۆ دەكرێ و زۆر مەترسیداریشە، مەسەلەی پەروەردەكردنی داعشەكانە لەلایەن سەركردەكانی رێكخراوی داعشەوە. هەرچەندە مانگێك پێش ئێستا بوو هەواڵێك بڵاوبووەوە لەبارەی كتێبخانەیەكی ئەلیكترۆنیی گەورە و نهێنیی سەر بە رێكخراوی داعش، كە هەزاران كتێب و بەڵگەنامە و فیلم و وێنەی تێدایە و هەر ئەو كاتەش شارەزایانی بواری تیرۆر هەواڵەكەیان پشتڕاستكردەوە!، بەڵام ئایا تائێستا توانراوە زەفەر بەم كتێبخانەیە ببرێ و رێگریی بكرێ لەوەی ببێتە سەرچاوەیەكی دەوڵەمەندی پەروەردەكردنی ئەندامانی داعش، بڕواناكەم و گومانم هەیە!.

هەڵبەت رێكخراوی داعش بەگشتی و سەركردەكانیشی بەتایبەت، سەرەڕای بایەخی زۆریان بە پەروەردەی سەربازیی ئەندامانیان، كەچی گرنگییەكی زۆریش دەدەن بە پەروەردەكردنیان لەڕووی دینی و عەقیدەییەوە، كە ئەمەش واتا پەروەردەیەكی حزبی بەپێی ئەو پرۆگرام و كتێبانەی كە دەبنەهۆی ئامادەكردنی ئەندامانیان لەڕووی عەقیدەییەوە و لەلایەن سەركردەكانیانەوە ئەو پرۆگرامە دادەندرێ و كتێبەكانیش دیاریدەكرێن.

بڵاوبوونەوەی هەواڵی بوونی ئەو كتێبخانە ئەلیكترۆنییە گەورەیەی داعش، بەڵگەیە كە سەرانی داعش لە عیراق و ناوچەكە و جیهان، بایەخێكی زۆر بە چەكداركردنی داعشەكان لەڕووی عەقیدەیی و فیقهییەوە لەڕێگەی كتێب و وێنەو ڤیدیۆوە، دەدەن!.

پێشتر چەند جارێك جەختم لەسەر ئەوە كردۆتەوە كە شكاندنی داعش تەنیا لەڕێگەی جەنگ و بەرەنگاربوونەوەی سەربازییەوە نابێ، بەڵكو لەمە گرنگتر، تێكشكاندنیەتی لەڕێگەی شەڕی فیكرییەوە، لەڕێگەی بنەبڕكردنی ئەو هۆكارانەوە كە بوونەتە زەمینەیەك بۆ گەشەكردنی داعش، لەڕێگەی لەناوبردنی ئەو ژینگە كۆمەڵایەتییەوە كە داعش لێی سوودمەندە و دەبێتەهۆی گەشەكردنی، بەڵام ئایا هیچ هەنگاوێك بۆ ئەم هەڵمەتە گرنگە نراوە؟ ئەویش هەر لێی بەگومانم و ئەگەر هەوڵیش لەوبارەیەوە درابێت، ئەوا دڵنیام لەو ئاستەدا نەبووە كە لەسەر زەمینی واقیعدا كاریگەریی بەكردەوەی هەبووبێت.

گروپە تیرۆریستییەكان، بەداخەوە، هەوڵیانداوە و هەوڵیشدەدەن ئەو تاكانەی كۆمەڵ بقۆزنەوە كە گرفتی خێزانی و كۆمەڵایەتی و بژێوی و تەنانەت بۆشایی فیكریشیان هەیە و پاش ماوەیەك پەروەردەكردن و سەرمەستكردن بە بەدەستهێنانی بەهەشتی ئەو دنیا و پوچیی ژیانی ئەم دنیایە لەخشتەیان دەبەن و ئامادەیان دەكەن بۆ كاری تیرۆریستیی نامرۆڤانە، هەڵبەت ئەمەش لەڕێگەی شوشتنەوەی مێشكیانەوە، كە كتێب و وێنە و ڤیدیۆی نێو كتێبخانەی ناوبراو، بەدڵنیاییەوە یارمەتیدەری بنەڕەتییانە بۆ ئەم پەروەردەیەی ئەندامان، كە باوەڕیان پێهێنراوە، ئەو تاوانەی ئەوان بەرامبەر بە خەڵكی بێتاوان دەیكەن، واجبێكی شەرعییە و لەپێناوی سەرخستنی دینی ئیسلامە!.

چەتەكانی داعش تائێستا لەڕێگەی ئەندامانی پەروەردەكراویانەوە توانیویانە گەلێك تاوانی قێزەونی نامرۆڤانە بەرامبەر بە خەڵكی بێتاوان بكەن لە بن چەتری بیانووی شەرعی و فیقهییەوە و بەردەوامبوونیان لەسەر ئەم پەروەردەكردنەی ئەندامانیان لەڕووی دینی و عەقیدەییەوە، بەردەوامبوون و درێژەدانە بە رشتنی خوێنی خەڵكی بێتاوان، لەهەمان كاتیشدا چارەسەركردنی ئەو هۆكارانەی دەبنە ژینگەی یارمەتیدەری گەشەكردنی داعش، وەك باشكردنی بژێویی خەڵك، نەهێشتنی قەیرانەكانی ئابووری و سیاسی و هتد، زامنكردنی ژیانێكی ئارامە بۆ خەڵك!.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.