سەرەتا/ لەبارەی دابڕان/ پەیوەندی/

قسەیەكی دڵسۆزانە بۆ یەكگرتووەكان
ئایە كۆنگرەی كۆمەڵ، یەكگرتوو بەرەو داخرانی زیاتر دەبات؟

24/02/2021



ئەبوبەكر كاروانی‌

سەرەتا پیرۆزبایی لە خوشك و برایانی كۆمەڵی دادگەری كوردستان دەكەم بە بۆنەی كۆتاییهاتنی كۆنگرەكەیانەوە. هیوادارم بەردەوام لەگەشەكردن و پێشكەوتندابن و بەسەر ئاستەنگەكانی سەر ڕێگەیاندا زاڵ ببن. سەبارەت بەگۆڕینی ناوی حیزبەكەو ئاوەڵناوی كەسی یەكەمیش، حەزدەكەین ئەم سەرنجانەی خوارەوە بخەینە ڕوو:

١- بەسیفەتی خاوەن فیكرێك كە چەندین ساڵە بانگەشە و تەنزیر بۆ نوێكردنەوەی تەوژی ئیسلامی دەكەم، دەستخۆشی زۆرم بۆم هەنگاوە بوێر و پێشەنگانە هەیە.

جێگەی سەرنجە حیزبێكی پاشخان جیهادی بتوانێ هەنگاو بە هەنگاو خۆی بكاتەوە، تا دەگاتە لێكردنەوەی پاشگری ئیسلامی و گۆڕینی ناوی ئەمیر و پێشتریش گۆڕینی ئاڵا.

بە پێچەوانەی هەندێ كەس و ناوەندیش لە بازنە ئیسلامی و عەلمانییەكەی كوردستاندا، كە لەم كاتانەدا بۆ گومان خستنە سەر هەنگاوەكان، دڵی خۆدانەوەو تێكنەچوونی هاوسەنگی دەروونی و دەمارگیری حیزبی و ئایدۆلۆژی، كە هەندێ هەڵوێستی توندی فیكری مامۆستا عەلی باپیر لە رابردوودا دەكەن بە كەرەسەی هەڵوێست دەربڕین، ئەو خاڵە نەك هەر نیشانەی لاوازی و دوو فاقیی نییە، بەڵكو نیشانەی ئەرێنی و شایستەی پێشوازی لێكردنە، چونكە ئاماژەیە بۆ توانای ڕەخنە لە خۆگرتن و كرانەوەو تێپەڕاندنی قاڵبە زیهنییە كۆنەكان.

پێم وایە لەم ڕوەوە ئە وكەسانە زۆرتر لە ژێر پرسیاردان، كە لە كاتێكدا كۆمەڵ و سەرۆكەكەی بەو شێوەبوون، ئەوان ڕەمزی كرانەوە بوون، كەچی ئێستا لەكاتێكدا م.عەلی باپیر و كۆمەڵ لە هەندێ روەوە، ڕۆژ بە ڕۆژ ئەوان بەجێدێڵن، ئەگەر نەگەرابنە دواوە لە جێی خۆیان چەقیان بەستوەو هەموو گۆڕانكارییەك رەت دەكەنەوە!!

٢- گۆڕینی ناو سەرەتای ڕێگایە، كەسیش نەیوتووە هەر هێندەی ناو گۆڕا، قەڵەمبازێكی گەورە ڕوودەدا، چونكە ناوگۆڕین و پاشگری ئیسلامی لابردن وەكو زۆربەی حیزبە ئیسلامیەكانی جیهان شكاندنی بەربەستێكە لە نێوان خۆت و خەڵكدا، پێش هەموو كەسیش خەڵكە دیندارەكە، كە پاشگرەكە بۆی بووە بە سەرچاوەی گومان و بۆنی ئیستیغلالی دین كاسبی كردنی بەسەرییەوە لێ دەكات. وە ئاماژەی ئەرێنی ناردنە بۆ ناوخۆو دەرەوە لە چەندین روەوە، كە پێشتر لە كتێبەكانمان لەسەر تەوژمی ئیسلامی و پێویستیی خۆنوێكردنەوەی، ئاماژەمان پێكردوون.

بۆ ئەوەی هێزێك بتوانێت دەرگای ڕۆڵبینینی سیاسی و جەماوەریی لەبەردەمدا كراوەتر بێت، پێویستی بە دووبارە خۆبیناكردنەوەو گۆڕانكاری قوڵتر هەیە، كۆمەڵیش لەم روەوە هێشتا ماوەی بەرچاوی لە بەردەمدا ماوە بیبڕێت، بەڵام ئەگەر لەسەر ئەم ڕیتمەی ئێستا بروا دەتوانێت لە ئایندەدا لەم روەشەوە هەنگاوی گەورەتر بهاوێت، هەر لە ئێستاشەوە هیوای سەركەوتنی بۆ دەخوازم

٣- ئەزموونی كۆمەڵ و نەهزەی تونسی و زۆر شوێنی تر پێمان دەڵێت: بە یەكەوە كۆبونەوەی سەركردایەتی فیكری و سیاسی لە كەسی سەركردەداو بڕوابوونی كەسی یەكەمی حیزب و هێزەكان بەكرانەوەو پێداگری لەسەری، بەتایبەتیش لەم ناوچەدا، ڕۆڵی یەكلاكەرەوەیان هەیە. ئەو ئەندازە كرانەوەو بەرەو پێشچونەی لەكۆمـەڵیشدا بەدیهاتووە، فەزڵی یەكەمی بۆ م.عەلی باپیر و توانای خۆگۆڕینی ئەو دەگەڕێتەوە. لەكاتێكدا لێكجیایی سەركردایەتی فیكری و سیاسی لە هەندێ هێزی تردا چەندین دەرفەتی خۆ نوێكردنەوەی لەدەستدان!

قسەیەكی دڵسۆزانە بۆ یەكگرتووەكان

لەبەر ئەوەی كۆنگرەی كۆمەڵ كاردانەوەی جۆراوجۆری لەناو یەكگرتوودا بەدوای خۆیدا هێناوە، كەشتێكی سروشتیە، حەزدەكەم ئەم سەرنجانە بخەمە بەردەم خوشك و برایانی خۆم:

١- دەزانم بەشێكی بەرچاو لە یەكگرتووەكان ئەمڕۆ بە ئاستی جیاواز تاڵاوی دەرونیان چەشتوەو هەستیان بە جۆرێك لە بەجێمان كردووە! لەو سۆنگەوە كە پێیان وایە هەندێ هەنگاو لە لایەن هەندێ هێزەوە دەنرێت، كە بە بروای ئەوان لە رابردوودا لە رووی فیكریی وسیاسی و كرانەوەشەوە زۆر لە دوای یەكگرتوەوە بوون، وە دەبوو حیزبەكەی ئەوان ئەم دەستپێشخەریەی بكردایەو ئەوەندە لە گۆڕانكاری نەترسایە. نایشارمەوە براشتان لە كاتێكدا دڵخۆش بووم بەوەی لەسەر ئاستی هێزێكی ئیسلامیدا، هەنگاوێ بەو ئاقارەدا نراوە لەگەڵ فیكرو هەوڵەكانی ڕابردووم تەبایە، لەهەمان كاتدا، هەستم بە دڵتەنگی دەكرد كە یەكگرتوو بەخوت و خۆڕایی بە بیانووی زۆر لاواز، چەندین دەرفەتی لەم روەوە لە دەست خۆیدا!.

هەر بۆیە لەم روەوە لە دڵەوە هاوسۆزتانم، ئەوانەشتان لە رابردوودا بەشێ بوون لە هەوڵی گۆڕانكاری، دڵتان بەوە خۆش بێت لە كاتی خۆیدا راست بیرتان كردۆتەوەو هەڵوێستی راست و دڵسۆزانەتان بە ئاقاری بەرژەوەندییەكانی یەكگرتودا گرتووە. هیوادارم بۆ بەشەكەی تریش كە بیركردنەوەیەكی جیاوازیان هەبووە، ببێتە هۆكاری بیركردنەوەیەكی جیاوازو دووبارە هەڵسەنگاندنەوەی گوتارو تەرح و قەناعەتەكان.
٢- هەوڵدەن یەكگرتوو بەرەو داخرانی زیاتر نەبرێت، چونكە بەش بەحاڵی خۆم پێشبینی ئەوە دەكەم. بە حوكمی ئەوەی، یەكێ لە كێشەكانی بڕیاردانی یەكگرتوو لە چەندین ساڵی رابردوودا، كەوتنە ژێر كاریگەری كۆمەڵبوو! بۆ نموونە یەكێ لەو پاساوە بەردەوامانەی بەرامبەر هەر داواكاری و بانگەشەیەك بۆ كرانەوە جەختی لێدەكرایەوە، ئەوە بوو كە هەنگاوێكی لەو شێوە كۆمەڵ دەیقۆزێتەوەو شەقامە ئیسلامییەكە بۆخۆی دەبات! ئێمەمانان زۆرمان لێ داواكردن لە ژێر هەژموونی كۆمەڵ لەم روەوە بێینە دەرەوە، بەڵام بەداخەوە بێ سود بوو!! ئستاش پێشبینی دەكرێت بە دیوەكەی ترداو بە ناوی ئەوەی كۆمەڵ ئاوەڵناوی ئیسلامیی لە خۆی كردۆتەوە، گۆرەپانەكە چۆڵ بووە و دەرفەتە بۆ راكێشانی سۆزی شەقامی ئیسلامی (كەنازانم چەندبوونی هەیەو ئەگەر هەیە چەندە)، هەروەها بە بیانووی ئەوەی ئێمە لەوە گەورەترین لاسایی كۆمەڵ بكەینەوە! بەرەو داخراوی زۆرتر برۆین؟

۳- تێگەیشتن لە دیاریكردنی كەرەسەو پێداویستیەكانی كاراو كاریگەربوونی سیاسی و نوێبوونەوەی روحی، مەسەلەیەكی زانستی و فیكرییە، بابەتی سۆزو حەماسەت بە خەرجدان نیە. سەرەتای هەموو هەڵسانەوەیەكیش، داننانە بە كەوتن و شكستدا.

جارێ شای ئێران داوای هۆكاری شكستی شەڕێكی لە جەنراڵێكی خۆی كردبوو، ویستبووی پینەو پەڕۆ بكات، ئەویش وەساندبووی و پێی وتبوو: (تا دان بەشكستدا نەنێین و هۆكارەكانی دیاری نەكەین، ناتوانین لە شەڕی داهاتودا بیبەینەوە!)
بۆیە یەكگرتووەكان لە قازانجیانە دان بەوەدا بنێن هەنگاوێك كە دەبوو ئەوان بینێن بە پاساوی لاواز نەیانتوانی! بەوەش دەرفەتێكی گرنگیان لە دەستدا.

خۆ خەریككردنیش بەوەی با مۆركی ئسلامی و دەعەوییەكەمان تۆختر بكەینەوە بۆ ئەوەی هەندێ لە دەنگەكان بەدەست بێنینەوە؟ لە چەندین روەوە هەڵەیە لەوانەش:

أ- هەڵبژاردنی پێشووی كوردستان ناومان نەگۆڕیبوو لەگەڵ بزوتنەوەش دابەزین و گوتارێكی خەستی ئیسلامیمان تەبەنی كرد كەچی لە سەدا ٦٠/ ی دەنگەكان و ٥٠/ ی كورسیەكانمان لەدەستدا.

ب- خەڵكی كوردستان تا راددەییەكی زۆر ئەوەی تێپەراندووە دین لە كادری حیزبی وەربگرێت و بەو هۆیەشەوە جەماوەر كۆبكرێتەوە.

ج- كۆمەڵ دام و دەزگای دەعەوی زۆرترە، سەلەفییەكانیش بەشێكی باش لە گۆرەپانەكەیان پڕكردۆتەوە، بۆیە ئەگەر مەبەست گەشەدان بە كورسی و سیاسی بێت ڕێگەی خۆی هەیە، بانگەوازو كاری روحی و ئەخلاقیش بەهەمان شێوە.

بەكورتی، وا چاكە یەكگرتوو لە ژێر هەژموونی كۆمەڵ و رەنگدانەوەكانی ململانێی حیزبیی نێوخۆیی بێتە دەرەوە و لە كاردانەوە خۆی بەدوور بگرێت. لە كەش و هەوایەكی ئارام و هەست بەلێپرسراویەكی قوڵدا بیر لە ئایندەو چارەنوسی خۆی بكاتەوەو ئەو هۆكارو رەگانەش دیاری بكات كە چەندین ساڵە ڕێگرن لەوەی توانای قۆستنەوەی دەرفەتی فیكری و روحی و سیاسی هەبێت و ئیرادەی گۆرانكاری لێ زەوتكردووە. ئاگاشی لەوە بێت وەك هەر هێزێكی تر مەشمولە بەرێسای خوایی (تداول)؛ وتلك الایام نداولها بین الناس.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.