سەرەتا/ لەبارەی دابڕان/ پەیوەندی/

خۆكوشتنی ژنانی ئێزدیی زیادیكردووە

پێش 2 هەفتە


 

رێكخراوێك كە كاری بە بەڵگەنامە كردنی دۆخی ئێزدیەكانە ئاشكرایكردووە، ئەو حاڵەتە خۆكوشتنانەی بەمدواییە لەناو كەمپی ئێزدییەكان لە باشووری كوردستان روودەدات، حاڵەتی جیاوازە، هەرچەندە ماوەی نێوان خۆكوشتنەكان كەمە و سێ لەوانەش تەمەنیان خوار 18 ساڵ بوو. سێ لەو كچانەی خۆیان كوشت، دوانیان تەمەنیان 15 ساڵ بوو، وەك ئەو رێكخراوەش دەڵێت دوو لەو كچانەی لەمدواییەدا خۆیان كوشت بەهۆی هەڕەشەی ئەلكترۆنییەوە بووە و هەرسێ كچەكەش لە كەمپەكانی شاریا و ئیسیان و بەرسڤی پارێزگای دهۆكە.

 

وەك عەلی ئیبراهیم بەرپرسی نوسینگەی شەنگالی رێكخراوی بەبەڵگەنامەكردنی ژیانی ئێزدیەكان ئاماژەی پێكردووە، ئەو دوو كچەی تەمەنیان 15 ساڵ بووە لەلایەن كەسانی نەناسراوەوە هەڕەشەیان لێكراوە و هەر ئەوەش بووەتەهۆی خۆكوشتنیان، كچی سێیەمیش كە تەمەنی نەگەیشتبووە 18 ساڵ بەهۆی كێشەی خێزانی و تێنەگەیشتنی هاوسەرەكەی لێی خۆی كوشتووە.

 

سەرچاوەیەكیش لە كەمپی شاریا بە ماڵپەڕی حوڕرەی ئەمریكی وتووە، هەندێك لە كچان و ژنانی ئێزدی لەكەمپەكان گێچەڵیان پێدەكرێت و هەوڵی دەستدرێژی كردنە سەریان دەدرێت. خۆكوشتنی كچان و ژنانی ئێزدی لەكاتێكدایە، ئێزدییەكان بەهۆی ئەوەی ئاینیان جیاوازە، لە ترسی داعش و گروپە توندڕەوەكان پەنایان بۆ كەمپەكان بردووە، دوای ئەوەی ساڵی 2014 لەلایەن داعشەوە رووبەڕووی كۆمەڵكوژی بوونەوە، بەوهۆیەشەوە بەپێی ئامارە جیاوازەكان زیاتر لە پێنج هەزار كچ و ژنی ئێزدی لەلایەن ئەو رێكخراوە توندڕەوەوە رفێندران، تەنها توانراوە كەمتر لە نیوەشیان ئازاد بكرێن و بەشێكی زۆریان وەك كەنیزە كڕین و فرۆشتنیان پێوەكراوە.

 

مانگی 12 ی ساڵی رابردوو، نەتەوەیەكگرتووەكان هۆشداری دا لە زیادبوونی حاڵەتەكانی خۆكوشتن لەناو ئێزدییەكان و رایگەیاند لە ماوەی چەند ساڵی رابردوودا خۆكوشتنی ئێزدییەكان زیادیكردووە، بەتایبەتیش ژنانی ئێزدی. بەپێی ئامارێكی نەتەوەیەكگرتووەكانیش، لە ساڵی 2019 دا 590 كەس لەعێراق خۆیان كوشتووە، هەزار و 112 كەسیش هەوڵی خۆكوشتنیان داوە، كە %80 یان ژن بوون. لەم چەند ساڵەی دواییدا بەهۆی ئەو دۆخەی عێراق و بەتایبەتیش ناوچەی ئێزدییەكانی تێكەوتووە، خێزانە عێراقییەكان بەدەست كێشەی دەروونییەوە دەناڵێنن، بەهۆی ئەوەی بەشێكی زۆر لەئێزدیەكان تائێستا لە كەمپەكاندا دەژین.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.
Developed by Avesta Group and powered by Microsoft Azure