سەرەتا/ لەبارەی دابڕان/ پەیوەندی/

كوڕەكەی عەلی باپیر، چی دەڵێ؟ بە كێ دەڵێ؟

پێش 2 هەفتە


ڕێبوار شارەزوری - دابڕان

"لە ئاسمانم پرسی بۆ لە خاکی ئێمە مەگەر کەم دەنا باران نابارێ؟
ئاسمان ڕووی لێم مۆنکرد و لێمهاتە گۆ، گوتی خاکی ئێوە زبڵگەیە؛ هەڕەمی قوڕینەی چەندان بەچکە فیرعەون و هێلانەی هەزاران شەمشەمەکوێرەو تەپۆیە.
خاکی ئێوە بۆ کەمینەیەك بەهەشتیانە، زۆربەشتان بۆ قومێك ئازادیی و پارویەکی حەڵاڵ لە ڕووحدانە.
تاوانەکانتان توند دوو چاوی منیان گرتووە، هەرچەند دەبارێنم، فرمێسك بۆ کەسە پاکەکانتان دەڕژێنم بەس پێتان ناگا، بەرپرسەکانتان لەنێوان من و ئێوە وەك پەرژینن، تا ئەو فیرعەونانە لەنێوتاندا مابن، مەگەر بەس قوڕتان بۆ ببارێنم.
شەریف عەلی باپیر"

 

ئەم نوسينەى سەرەوە، شەریف عەلی باپیر، كوڕی ئەمیری چەندینساڵەی كۆمەڵی ئیسلامیی كوردستان، لە پۆستێكیدا لە تۆڕی كۆمەڵایەتی فەیسبوك، بڵاوى كردۆتەوە. 
ئەم وتانەی شەریفی كوڕی مامۆستا عەلی باپیر لەكاتێكدایە كە ناوبراو، كوڕی یەكێك لەسەركردە دیارەكانی یەكێك لە حزبە ئیسلامییە حوكمڕانەكانی هەرێمی كوردستانە كە لەو ڕۆژەوەی لەسەر تەختی كورسی ئەميريی حزبەكەى دانیشتوە، بۆ تەنها جارێك و ڕۆژێكیش چۆڵی نەكردووە، ئەمە سەرەڕای چەندین گلەیی و گازندەی حزبی و دروستبونی ناكۆكی و تەنانەت جیابونەوەی باڵ لە لەناو كۆمەڵدا لەسەر ئەو "تاكە كورسييە"ى كە بە ماڵی دنيا ناوى دەبەن.

كاك شەریف هەم لەحزبەكەی خۆیاندا كەس و بەرپرسی یەكەمن و هەم حزبەكەشیان لەناو حكومەتدا بەشدارن و وەزارەتیشیان هەیە و تەنانەت لەهەردوو پەرلەمانی كوردستان و عێراقیش، لەپشكی كۆمەڵی ئیسلامی، پەرلەمانتاریان هەیە.

لەگەڵ ئەوەشدا، شەریف و خێزانەكەیان زۆر شەریفانە و بە خۆشگوزەرانیی لەدەرەوە و ناوەوەی وڵات ژیان بەڕێ دەكەن و لەموڵك و ماڵ و پارەو داهات و خەرجی، لەهیچ خزمەتگوزارییەكیان كەم نیە، بۆيە كەم تازۆر پەیوەندییان بەژیانی گەنجی كوردستانەوە نیە و ناتوانن وێنای خۆیان وەك ئەوان بكەن، یاخود وەك دەمڕاستی گەنج و خەڵكی كەمدەرامەتی كوردستان بدوێن.

كاتێك شەریف باسی فیرعەونەكان و شەمشەمەكوێرەكانی كوردستان دەكات، دەبێت زیاتر ڕووی پۆستی فەیسبوكەكەی لە كامانە بێ؟ ئەگەر لەگەڵ بەرپرسە گەندەڵ و پارەخۆرە حزبی و حكومییەكانی هەرێمی كوردستانی بێت، دەستی خۆش، زۆرینە هاوڕان، بەڵام ئەو بەرپرسانەی بەناوی خوا و ئاین و وەكیلیی خواو حزبایەتی بەناوی خواوە گەندەڵی دەكەن، تاوانەكەیان لەلای خوا گەورەترە، یان ئەوانەی ناوی خوا ناهێنن؟! یان كاكە شەریف هەر لە هەڕەتی گەنجییەوە ڕێچكەی باوكی گرت و هاتە گۆ، بەناوی خوا و ئاسمانەوە قسان بكات و خۆی و ئەوان لە هەموو گەندەڵی و نادادییەك بێ بەری بكات!

هەر لەو كورتە نوسینەدا، كوڕی ئەمیری یەكێك لەحزبە ئیسلامییەكان، بەناوی ئاسمانەوە، گلەیی دەكات! و دەڵێت: "خاكی ئێوە، مەبەست لێی كوردستان، بۆ كەمینەیەك بەهەشتە"، ئەم وتەیە ڕاستە، جوانە، دروستە... بەڵام كاتێك كاریگەریی دەبێت و دەبێت بكرێت، كە قسەكەر لەزۆرینە بێت و بەهەشتێكی لەم دنیا بۆ نەسازێندرابێت، ئەگەرنا، نەكرێت باشترە.

دواتر دەڵێت: "زۆربەتان بۆ قومێك ئازادی لەڕوحدانە"، لێرەدا  كاك شەریف كە زۆر بە "ئازادانە" نوسيويەتی، مەبەستى ئەوەیە دەسەڵاتی حوكمڕانی هەرێم، ئازادی بەرتەسك كردۆتەوە، ئازادی بیروڕا نیە، ئازادی ڕادەربڕین نیە، تەنانەت قومێك ئازادیش نیە! ئێمە لێی دەپرسین، چاوێكت بە كتێب و نوسینەكانی مامۆستای باوكتا خشاندۆتەوە؟ گوێت لە وتارەكانی گرتوە؟ بزانە كە ئەو، بەڵێ ئەو، دەڵێت: دیموكراسی كوفرە، پەرلەمان، كە یەكەم سمبولی دیموكراسییە، ئەویش كوفرە، كەواتە لەبارەی ئازادیی و چەمكە نزيكەكانيەوە، پێویستە زیاتر ڕاوێژ لەگەڵ باوكت بكەیت، پاشان بنوسیت.

لەبەشێكی تری وتارە گلەیی ئامێزەكەیدا لە گەل و دەسەڵاتی كوردستان، شەریف بەناوی ئاسمانەوە، دەڵێت: "بەرپرسەكان وەك پەرژین و ڕێگر وان لەبەردەم من و ئێوە، تا ئەو فیرعەونانە مابن مەگەر قوڕتان بۆ ببارێنم!"

ئێمەش دەڵێين، لەكوێی قورئان و حەدیسدا خوا داوای لە مامۆستا عەلی باپیرو هاوحزبەكانی و هەموو ئیسلامی سیاسی كردووە حزبی سياسی دابمەزرێنن بەنوێنەرایەتی خوا و بەناوی خوا، لەكوێدا فەرمويەتی سياسەت بكەن بەناوى منەوە؟، لەكوێدا فەرمویەتی وەرنە سەر شاشەكان باس لە خەوێكی هاوشێوەی وەحی بكەن بەناوی منەوە؟، لەكوێدا فەرمویەتی بچنە ناو پرۆسەیەكی حەرام و كوفرەوە، ئەگەر لە بەرژەوەندی خۆتان و دەسەڵات و كورسییەكەتان بو؟! بۆيە ئەگەر پێت وايە ئاسمان بيەوێت قوڕ ببارێنێت، ڕەنگە بەشێك لەهۆكارەكەى، ئەگەر هەموى نەبێت، لە ئازيزەكانی ئێوەبن.

 

سەير لەوەدايە، لەسەر دەربڕينی بيروبۆچونە ئازادەكانی، شەریف عەلی باپیر، لە یەكێك لە پەیجەكان لەتۆڕی كۆمەڵایەتی فەیسبوك، بە كۆمێنتێك وەڵامی ئەو كەسانەی داوەتەوە كە كۆمێنتیان بۆ نوسیوە و بيروبۆچونی خۆيان دەربڕيوە، دەڵێت: "کە کۆمێنتەکانیان دەخوێنمەوەو دەبینم چۆن خەڵکێکن پڕن لە تاریکیی و ناڕۆشنبیری و جنێو، ئەوجا تێدەگەم بۆ خوا ئەو فیرعەونانەی لێکردوون بە کەڵەگا. لێك پیرۆزبن."

لە كۆتايی كۆمێنتەكەيدا كە دەڵێت "ئەوجا تێدەگەم بۆ خوا ئەو فیرعەونانەی لێکردوون بە کەڵەگا."، هەر لەوێدا بڕياردەدات و يەكلاى دەكاتەوە كە خوا سزاى گەلی كوردى داوە، پاشان كە دەڵێت "لێك پیرۆزبن." لەوێشدا هيواى ژيانێكی ناخۆش و پڕ لە مەينەتی بۆ هەموو ئەو كەسانە دەخوازێت كە كۆمێنتيان نوسيوە!.

"بەپێی بۆچونی نوسينەكەى خۆى".

نوێترین


کاریکاتێر

وێنەهەواڵ

© 2016 Dwryan.net. All Rights Reserved.
Developed by Avesta Group and powered by Microsoft Azure