سەرەتا/ لەبارەی دابڕان/ پەیوەندی/

ڕەحمەت لەدەسەڵاتی كوردی

10/12/2020


ڕەحمەت لەدەسەڵاتی كوردی
مانەوەی پارتی و یەكێتی و گۆڕان گرنگە
د.سالار تاوگۆزی


ئەگەر ئەمە قسەی خۆپیشاندەر و خۆپیشاندەران بێت و پێیانوابێت  (مەلا كرێكار) چارەسەر و بەدیلە و دەتوانێت سەركردایەتی شۆڕش دژی پارتی و یەكێتی بكات، ئەوا من دەڵێم: "هەزار ڕەحمەت لە دەسەڵاتی كوردی كە پارتی و یەكێتی و گۆڕان ئێستا نوێنەرایەتی دەكەن".

كارەساتە خۆپیشاندەرێك كە لەلایەن بانگخوازێكی جیهادی جیهانیەوە، بەقسەی باق و بریق و گوتاری دژ بەگەندەڵی، بۆ مەرامی سیاسی، غەسل دەماغ كراوە، لەئەم بارودۆخە هەستیارەدا كە قەوارەی هەرێمی كوردستان لەمەترسیدایە بڵێت"تاكە كەس بتوانێت سەركردایەتی شۆڕش و خەباتی چەكداری دژی پارتی و یەكێتی بكات مامۆستا كرێكارە". ئەم قسەیە ئەگەر بوو بەوێردی سەرزاری خۆپیشاندەران، ئەوا دەگەڕێینەوە بۆ یەمەن و تۆارابۆرا و هەورامان و موسڵ و ڕەققە لەئەوجی دەسەڵاتی ئیسلامیە جیهادییە موخەڕڕیبەكاندا.

خۆپیشاندەری گەنجی ناڕازی خەیاڵ خاو، پێیوایە ئەگەر (مەلا كرێكار) دەسەڵاتی پارتی و یەكێتی و گۆڕانی ئێستا ڕابماڵێت، دەسەڵاتێكی وەكو (نەرویج)ی بۆ دادەمەزرێنێت كە چەند ساڵ مەلای بەخێو كردووە و كاكی خۆپیشاندەریش خەونی پێوە دەبینێت.

 كاتی خۆیشی هەر كە دیتم لە خۆپیشاندانەكانی حەڤدەی شوبات كۆلكە مەلایەكی سەلەفی عەقیدە جاڕی جیهادی لەپاڵ خۆ بەڕۆشنبیرزانێكی هەلپەرستدا لێدا و خۆپیشاندەرانی ئەو كاتیش هوتافیان بۆی كێشا، ئیدی هیچ ئومێدێكم بە ئەو تاپیە لە خۆپیشاندەری كوردی نەما كە هەڵگری گەرای فیكری جیهادی و گوتاری تێكدەرانەیە، بەڵام بێگومان خۆپیشاندەری هۆشیار و مەدەنی جێگەی تەقدیر و شیاوی گوێ لێگرتنە.

بەكوردی و بەكورتی دەڵێم: ئەگەر نموونەی باڵای خۆپیشاندەران مەلا كرێكارە، ئەوا مانەوەی پارتی و یەكێتی و گۆڕانی ئێستا بەهەموو كەموكوڕییەكانیانەوە گرنگە و گەرەنتی بە یەمەن نەبوونی واقیعی كوردستانن.

ئەمەی گوتم ڕەخنەیەكە لەعەقڵی خۆپیشاندەرێك، نەك گشتگیری بكەم، خۆپیشاندەریش كە ڕەخنە دەگرێت، دەبێت ڕەخنەلێگرتنیش قەبوڵ بكات، ئەگەر نا لەگەڵ ئیسلامییە جیهادییە توندڕەوەكاندا جیاوازی نییە.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.
Developed by Avesta Group and powered by Microsoft Azure