سەرەتا/ لەبارەی دابڕان/ پەیوەندی/

"مێ بوون" لە زمانی ڕۆژنامەنوسێكدا

30/11/2020


"مێ بوون" لە زمانی ڕۆژنامەنوسێكدا 

ڕزگار عومەر

دوای ١٧ سەعات لە بڵاوبوونەوەی پۆستێكی "ڕێبوار كەریم وەلی"، ڕێك لە كاتژمێر 6:30ی بەیانی ڕۆژی ٣٠/١١/٢٠٢٠ ژمارەی لایكەكانی گەیشتبووە ١.٦ هەزار لایك و ١٨٦ كۆمێنت و ٣ جاریش شێركرابوو.

ڕێبوار لە كۆمێنتەكەی نوسیبووی "گۆڕان وەكو بێوەژنێكی سیاسیی لێھاتووە، یەكێتی ھەندێك لە منداڵەكانی بۆخۆی بردووە، بەس ماوە دایكەكەیان مارە بكاتەوە". زۆربەی كۆمێنتەكانیش كە دژی ئەم پۆستەی ئەو قسە دەكەن بە هەمان میتۆدو بە هەمان ریتم ڕەخنەی لێدەگرن كە بریتیە لە تێكەڵ كردنی "جەستە (هەردوو ڕەگەز)، سێكس" لە ڕەخنەی سیاسیدا.

كۆنەپەرستی و دواكەوتوویی ئەم تەعبیرەو لێكچواندنەی ڕێبوار تەنیا كێشەیەكی "فێمینیستی" نیە، بەڵكو گرفت لەوەدایە كە ئێمە تەنیا لەو نموونانەوە بەشێكی گەورەی ئێستاو ئایندەی ئەدەبی سیاسی دەبینین كە لە پرۆسەكی خێرای نزمكردنی هۆشیاری و زەوقی گشتی كاردەكات.

كاتێك نوسینێك، ڕەخنەیەك، ڕستەیەكی سیاسی دەكەوێتە ناو فەزای گشتی، بە تایبەتی ئەگەر لە فیگەری ناسراو بێت، بە چاپۆشینیش لەوەی ئەم فیگەرە خۆشەویستە یان نەفرەت لێكراوە لەلایەن بەشێك لە ڕای گشتی، ئەم ڕستە سیاسیە هەڵگری هەر لێك چواندن "وێناكردنێك" بێت جێ پەنجەیەك لە سایكۆلۆژی گشتی جێدەهێڵێت.

ناسیۆنالیزمی كورد، بە تایبەتی ئەو بەشەی سەدان چەشنی ڕێبواری كردە فیگەری میدیایی خۆی، لە دووڕویەكی گەورەی چەشنی "شیزۆفرینا" ژیان بەڕێدەكات لە پرسی پەیوەندیدار بە "مێ" بوون لە كۆمەڵگەدا. ئەم ناسیۆنالیزمە كاتێك پێویستی بە داستانی نیشتیمانی و ئەفسانەی قەومی هەبێت دەست بۆ ستایشی "مێ" بوونێك دەبات لە چەشنی دایك، ژن، كچە شەهید! لە دونیای واقیعی حوكمگێڕانیشدا "مێ" بوون بە توندی پەیوەستە ڕستێك لە گۆرانی بێژو و مۆدیل و بەرهەمهێنانی مرۆڤێكی مێی دابڕاو لە هەموو شتێك كە وەكو بوكەڵەی سێكسی میدیا زەبەلاحەكانیان بۆ تەرخان دەكرێت.

لەم زەلكاوەدا، لەم دووفاقیەی سەرخانی زاڵی چارەكە سەدەیەكی ناسیۆنالیزمێكی ڕۆژهەڵاتی و خێڵەكیدا، پیاوسالارییەكی دەست لێنەدراو تەنیا خەریكی كوشتنی دایك و كچ و خوشك خۆشەویست نیە، بەڵكو خەریكی ڕەنگكردنی "زمان" و ئاخاوتنی گشتیە، بەم هموو ئەم وێنە لێكچواندنانەی دەگوزەرێت تەوقی سەر مێ بوون توندتر دەكرێت، كەسایەتی "بێوەژن" ئامانجی نزیكی ئەم كەلەپورە بۆگەنەیە، ئامانجە كۆتاییەكە "مێ" بوونە. دژە "مێ"بوونی زمان هیچی كەمتر نیە لەو گولە قەمانەی كچ و ژنانی پێدەكوژن.

لە نێو ئەم شەڕەی ڕێبوار و نەیارەكانی دروستی دەكەن لەسەر ئەم ڕستەیە، دۆڕاوی یەكەم تەنیا كەسایەتیی مەعنەویی ئەو بەشە لە كۆمەڵگەیە كە هێشتا دەیەوێ شەڕی "بەهاكان" بكات، ئەو "بەهایانەی" كە وەكو دەرفەتی لەدەست چوو ڕۆژ بەڕۆژ دەیكەن بە بەشێك لە ڕابردوو.

نوێترین


کاریکاتێر

وێنەهەواڵ

© 2016 Dwryan.net. All Rights Reserved.
Developed by Avesta Group and powered by Microsoft Azure