سەرەتا/ لەبارەی دابڕان/ پەیوەندی/

بێناسنامەكان..گۆڕستانی ئەو ژنانەی بێكەسكوژ كران

26/11/2020


بێناسنامەكان لەگردی سەیوانی شاری سلیمانی، كۆمەڵە گۆڕێكی بێنازی ئەو ژنە خنكاو و كوژراوانەن كە لەژیان ‌و مردنیشیاندا بەدبەخت ‌و دڵشكاو بون.

"بێناسنامەكان" دەكەوێتە بەشی خواری خوارەوەی گۆڕستانی سەیوان، ئەوانەی لێرەدا بەخاك سپێردراون ئەوەندە بێكەسن كە ساڵ دێت ‌و دەڕوا كەسێك نابینی بێت ‌و فرمێسكێكیان بۆ هەڵڕێژێ یاخود گوڵێك بخاتە سەر گۆڕیان.

گۆڕی ناڕێك ‌و بەگڵ داپۆشراویان باشترین گوزارشت لە بەدبەختی ئەوانە دەكات كە لەم روبەرە پەراوێز و لەبیركراوەی گۆڕستانە ناودارەكەی سلیمانیدا بەخاك سپێردراون.

لەبەشی ‌سەرەوەو خوارەوەی هەر گۆڕێكیاندا دو كێلە بەردی كورت ‌و خوار دانراوەو زۆربەیان لەبری ناو و بەرواری مردنیان، ژمارەیەكیان بە بۆیەی سور و پەمەیی لەسەر نوسراوە، كە دەریدەخات ئەوانەی لەژیانیاندا بەدبەخت بون، لەمردنیشیاندا داماو و بەدبەختن.

عوسمانی گۆڕهەڵكەن دەڵێت، رێژەیەكی بەرچاو لەگۆڕەكانی ئەم گۆڕستانە كە ژمارەیان زیاتر لە 2000 گۆڕ دەبێت، ئەو كچ‌ و ژنانەن لەلایەن كەسوكار یان كەسانی نەناسراوەوە كوژراون ‌و زۆربەشیان قوربانی توندوتیژیی كۆمەڵایەتین.

عوسمان كە ‌بە درێژایی سیانزە ساڵی رابردو ‌مردوشۆر و گۆڕهەڵكەنی ئەو مردوانە بوە كە بێ‌ ناسنامەن ‌و رێی مردن ‌و بەخاك سپاردنیان كەوتوەتەوە ئەم گۆڕستانەوە، بەدەم سەیركردنی گۆڕە زۆر و زەبەندە بێنازەكانی بەردەمیەوە، بەدەستی ئاماژەی بەڕوبەری گۆڕستانەكە كردو وتی"ئەوانەی لەم روبەردەدا بەخاك دەسپێردرێن خاوەنیان نییە ‌و بێكەسن، دوای ئەوەی چەند مانگێك لەبنكەی پزیشكی دادوەریی دەمێننەوە دواتر لێرە بەخاك دەسپێردرێن".

وتیشی"هەمو ساڵێك چەند ژنێكی كوژراو لێرە دەنێژرێن، لەساڵی 2019دا ژنێكی گەنجی رۆژهەڵاتی كوردستانم بەخاك سپاردوە كە پاش كوشتنی تەرمەكەیان لەناوچەی شارباژێر فڕێدابو، تەمەنی 30 ساڵ بوو، ماوەی 3 مانگ لەبنكەی پزیشكی دادوەریی مابۆوە، كەس نەبوو بە خاوەنی، كەسیش نەیزانی لەسەرچی كوژراوە".

ئەم گۆڕهەڵكەنە ئاماژە بەوە دەكات ژمارەی ئەو ژنانەی بەهۆی كێشەی كۆمەڵایەتیەوە دەكوژرێن ‌و كەس لێیان ناپرسیتەوە، لەساڵێكەوە بۆ ساڵێكی تر جیاوازە، ئەو وتی "ساڵی وا هەیە 10 ژنی كوژراوم لەم گۆڕستانەدا بەخاك سپاردوە، كە دوای بەخاك سپاردنیان من ‌و خوا نەبێت كەس نەهاتوەتە سەر گۆڕەكەیان".

عوسمان كە شەڕواڵ ‌و مراخانێكی رەنگ كاڵەوەبوی لەبەردایە، لەنێو ئەم هەمو گۆڕە خوارو ناڕێكەدا وەك ئەوەی كارێكی پێچەوانەی یاساكانی سروشتی بەدیكردبێت، پەنجەی بەرەو گۆڕەكەی "سنور" راكێشا، ئەو كچەی كە ساڵی 2015 لەباخچەی دایك لەشاری سلێمانی لەلایەن كەسوكاریەوە كوژراو دواتر لەگۆڕستانی بێناسنامەكان بەخاك سپێردرا، ئەو وتی "12 ساڵە گۆڕێكی بێناسنامەم نەبینیوە كەسێك بێت سەردانی بكات یان گوڵێك لەسەریان دابنێت، تەنانەت ناویشیان لەسەر گۆڕەكانیان نەنوسراوە، بەڵام تەنها گۆڕێك كە هەڵبەسترابێت لەناو ئەم بێناسنامانەدا گۆڕی سنورە كە لەلایەن یەكێتی ژنانەوە هەڵبەستراوە."

دیاردەی ژن كوشتن یەكێكە لەو دیاردانەی كە تا ئێستا لە كۆمەڵگەی كوردەواریدا بەردەوامە، تەنانەت پاش كوشتنیشیان گۆڕەكانیان لەگۆڕی مردوەكانی تر جیا دەكرێنەوە، لەسلێمانی ‌و هەولێریش دو گۆڕستانی تایبەت بەو كچ ‌و ژنە كوژراوانە هەن.

سەیوان ڕۆستەم بەرپرسی ڕاگەیاندنی یەكێتی ژنان دەڵێت"كەم ڕۆژ هەیە هەواڵی كوستنی ژنێك لاپەڕەی یەكەمی میدیاكانی داگیر نەكردبێت، زۆر بەداخین كە ئێستا گۆڕستانێكی بێناسنامەی پڕ لەژن‌ و كچی كوژراو لەوڵاتەكەماندا دەبینین، ڕاستە ڕێكخراوەكانی ژنان كاریان زۆر كردووە لەسەر ئەم پرسە، بەڵام ئەمە ئەوە ناگەیەنێت كە پلانێكی ستراتیجی ژنان نەبێت بۆ كەمكردنەوەی پرسی كوشتنی ژنان".

سەیوان ئەوە روندەكاتەوە كە چەندینجار سكاڵای ژن كوشتنیان گەیاندوە بە كاربەدەستان، بەڵام ئەوان وتویانە "كەس نایەت داوا تۆمار بكات لەسەر ئەو كەیسانە، چونكە بەدەستی كەسوكاری خۆیان دەكوژرێن".

بەرپرسی ڕاگەیاندنی یەكێتی ژنان وتی"ئێمە هەرگیز لەگەڵ جیاكردنەوەی ئەو گۆڕستانەدا نین، ئەمە بۆ كۆمەڵگەش جۆرێك لە كاریگەری زۆر خراپ و ناخۆش دروست دەكات، بۆیە پێویستە هەڵوەستە لەسەر ئەم حاڵەتە بكرێت‌ و ئێمە وەك خۆمان ڕامان وایە پێویست نییە لە دوای مردنیش ژنە كوژراوەكان گۆڕەكانیان جیابكرێنەوە".

هەرچەندە بەرپرسی ڕاگەیاندنی یەكێتی ژنان هیوای ئەوە ئەخوازێ لەكۆمەڵگەی كوردەواریدا ژن كوشتن نەمێنێ، بەڵام بەگوێرەی دوایین ئاماری بەڕێوەبەرایەتی گشتی بەرەنگاربونەوەی توندوتیژی دژی ژنان، لەماوەی سێ مانگی یەكەمی ئەمساڵدا لەشارەكانی هەرێمی كوردستان، 10 ژن كوژراون و 13 ژنیش خۆیان كوشتوە، زۆربەی كوشتن و خۆكوشتنەكانیش لە مانگەكانی كانوونی دووەم و شوباتی 2019 لەپارێزگاكانی سلێمانی و دهۆك بون.

سەركەوت ئەحمەد وتەبێژی پۆلیسی سلێمانی ئاماژە بەوە دەكات زۆربەی ئەو حاڵەتی كوشتنانە بەهۆی كێشەی كۆمەڵایەتی ‌و لەلایەن خێزانەكانیانەوەیە، بۆ نمونە كچێك پەیوەندی لەگەڵ كوڕێك دەبێت ‌و ئاشكرا دەبێت، یاخود بەهۆی كێشەی فەیسبوك ‌و لەو جۆرەوە.

وتیشی"ئێمە دوای گرتنەبەری ڕێكارە یاساییەكان ڕادەستی پزیشكی دادوەری دەكەین ‌و ئەوانیش دەیدەنە شارەوانی ‌و ئەوانیش بە ئەمانەت لەشوێنێكدا دەەینێژن تاوەكو كەسێك، خێزانێك، عەشرەتێكی پەیدا دەبێت".
سەرچاوە/ ئاوێنە

نوێترین


کاریکاتێر

وێنەهەواڵ

© 2016 Dwryan.net. All Rights Reserved.
Developed by Avesta Group and powered by Microsoft Azure