لەبارەی دابڕان/ پەیوەندی/

فەرەنسای كافر و كوردی موسوڵمان

پێش 4 هەفتە


محەمەد ئەمین پێنجوێنی 

لەم ڕۆژانەدا هێرشێكی نا ڕەوا دژی فەرەنسا و سەرۆكەكەی ماكرۆن دەستی پێ كردووە، لە پشتی ئەم هێرشەوە ئەو گروپانە هەن كە بە چەقۆ ژن و مامۆستای زانكۆ سەر دەبڕن، ئەمەش بە پشتگیری و هاندانی ئەردۆغانی سەرۆكی توركیایە،  فەرەنسا لە كۆنەوە دۆستی كوردە، پارتی سۆسیال دیموكرات و پارتی كۆمۆنیستی فەرەنسی هەمیشە پشتگیرییان لە دۆزی كورد كردووە، بە تایبەتی لە دەستپێكی شۆرشی ئەیلولەوە ڕۆژنامەكانی( لۆمۆند و لۆفیگارۆ) هەر ئەوان بوون لە ئەوروپا هەواڵی شۆڕشیان بڵاو دەكردەوە و داكۆكییان لە پرسی كورد دەكرد.
لێرەدا نابێت ڕۆڵی دكتۆر (قاسملو) بۆ ناساندنی كێشەی كورد بە بژاردەی سیاسی و ڕۆشنبیرەكانی فەرەنسا لە یاد بكەین .
من لێرە هەندێ نموونە دەخەمە بەردیدی خوێنەران
١- ئەوە مادام میتران بوو، بە یاوەری بێرنارد كۆشنەر وەزیری دەرەوەی ئەو كاتەی فەرەنسا، لەو ڕۆژە سەختانەی كە لە سەر سنووری حاجی ئۆمەران بە دەیان هەزاران مرۆڤی كورد گیریان خوارد بوو، ڕۆژانە دەیان منداڵ و پیر و پەككەوتەمان لە برسان و لە سەرمادا لێ دەمردن، ئەوە دانیال میتران بوو هات بۆ تاران و هاتە سەر سنوور و بە پێ سنوورەكەی بەزاند، لەسەر ئەو سنوورەوە داوای لە كۆماری ئیسلامی كرد كە سنوور بكاتەوە و نزیكەی یەك ملێون كوردی لە مردن رزگار كرد.
٢- هەر فەرەنسا بوو كە لە ئەنجوومەنی ئاسایشی نێوەدەوڵەتی، توانی پێشنیاری خەتی ٣٦ بكا بە بریاڕ و ناوچەی دژە فڕین دروست بكات و كورد لە جینۆسایدی سەدام ڕزگار بكات، هەر لە سایەی ئەم دژە فڕینەوە بوو كە ئەم قەوارەیەی ئێستا دروست بوو .

٣- دكتۆر عیسمەت شەریف وانلی لە نامیلكەكەیدا كە بە فەرەنسی نووسیویەتی لە ژێر ناوی( پانزە ڕۆژ لە كوردستانی ئازاددا) دەڵێت: دوای چەند مانگێك لە ڕاپەرینی باشوور لە كۆشكی ئەلیزێیەوە بانگیان كردم كە ڕۆژی ... لە دیوانی سەرۆكایەتی بۆ دیداری سەرۆك میتران ..!ئامادە ببم، كە چوومە بیرۆكەی سەرۆك ئەخزەر ئیبراهیمی وەزیری پێشووی دەرەوەی جەزائیر، كە ئەوكاتە یاریدەدەری سەرۆكی نەتەوە یەكگرتوەكان بوو، لەوێ دانیشتبوو، لێم پرسی خێرە؟ ووتی بۆ كێشەی ئێوەی كوردە، لەو كاتەدا فەرموویان لێ كردین كە بچینە ژوورەوە بۆ دیداری سەرۆك میتران، سەرۆك وتی بڕۆن بۆ كوردستان نامەی نووسراوی (جەلال تاڵەبانی، مەسعود بارزانی و دكتۆر مەحموود عوسمان)م، بۆ بێنن كە من بەم نزیكانە لە كۆبوونەی گشتی نەتەوە یەكگرتووەكان باسی سەربەخۆیی كورد دەكەم و ئامادەكاریشم بۆ كردووە با ئەو بەڕێزانە نەڵێن ئاگامان لێ نەبووە. و ١٥ ڕۆژ مۆڵەتتان هەیە،دكتۆر عیسمەت بەردەوام دەبێ و   ئەڵێ بە فڕۆكە هێنایانینە ئەو پەل(فەوج)ە سەربازییە فەڕەنسییەی كە لە ئاكرێ بوون، كاك عیسمەت لە نامیلەكەكەیدا دەڵێ ١٥ ڕۆژ بە كوردستاندا سوڕاینەوە نەمان توانی ئەو نامانە بە دەست بهێنین بۆ میتران، پرۆژەكەی فەرەنسا بوو بە قوربانیی..!
ئەخزەر ئیبراهیمی كە یەكێك بوو لە شۆڕشگێرەكانی جەزائیر پێ ووتم عیسمەت شۆرشگێرەكانی ئێمە و ئێوە زۆر لەیەك جیاوازن !!
٤- ئەو كاتەی شاندێك چووینە بارەگای نەتەوە یەكگرتووەكان، بۆ دیداری ( پەترۆس غالی) هەر لەو كاتەدا لە كۆنگرێسی ئەمریكی كۆبوونەوەیەكی تایبەتیی بۆدۆزی كورد هەبوو، لەسەر باگهێشتكردنی دكتۆر نەجمەدین ئێمەش چووین بۆ كۆبوونەوەكە. پێش ئەوەی بە جیهازی كۆنترۆڵەكەدا ڕەت ببین، مادام میتران لەسەر كورسیەك دانیشتبوو كە لێی نزیك بووینەوە هەڵسا تەوقەی لەگەڵ مندا كرد، چونكە من بە ڕانكوچۆغەوە چوو بووم. كاك عیسمەت شەریف وانلی ووتی مادام میتران ڕێز لە هەموو كولتووری كوردی دەگرێت نەك هەر كێشەی كورد .
٥- ئەو كۆنفراسەی مام جەلال ویستی بۆ چارەسەری كێشەی كورد لە باكوور، لە بەغدا سازی بكات.
( هەر وەكو مام جەلال خۆی ووتی بە هاندان و پشتگیری فەرەنسا و سەرۆك هۆلاند بوو كە ئەو كاتە سەرۆكی فەرەنسا بوو .
٦- فەرەنسییەكان یەكەم دەوڵەتی ئەوروپایی بوون كە پشتگیری ڕۆژئاوایان كرد بە تایبەتی لە شەڕی كۆبانی .
لە ژووری ئۆپەراسیۆنی (هاوپەیمانان - عێراق - كورد) زەخیرەیەكی زۆری شەڕ كۆكرابووەوە دەیانویست بە فڕۆكـە فریای شەڕڤانانی ڕۆژائاوای بخەن، ئەمەش كێشەیەكی لەناو هاوپەیماناندا دروست كرد بوو لەبەر توركیا!!! بەڵام فەرەنسییەكان پێداگر بوون لەوەی كە نابێت كۆبانی بكەوێت و بە دەردی شەنگال بچێت. ئەگەر ھەموو ناڕازی بن ئێمە بە تەیارەی خۆمان ئەم كارە دەكەین هەرواش بوو!!
٧- پێشوازیكردنی سەرۆك ماكرۆن لە شاندی شەڕڤانان و پێشمەرگە لە كۆشكی ئەلیزێ نامەیەكی گەورە بوو بۆ هەموو جیهان و ئەوروپا و ددانپێدانانێكی نێودەوڵەتی بوو، كە كورد شۆرش ئەكات بۆ مافی زەوتكراوی، هەر ئەو ڕق و قینەیە كە ئێستا ئەردۆغان بە ماكرۆنی دەڕێژی لە رێگەی گرووپە توندرۆكان و سەربڕرەكانەوە.
٨- لە ھێرشی حەشدی شەعبی بۆ سەر كوردستان عەبادی فەرمانی دابوو كە هەتا قوشتەپە و بانی مەقان پێشرەوی بكەن ئەوە فەرەنسا و ماكرۆن بوون بە عەبادییان ووت ( Stop)
٩- ئەوە هەر ماكرۆن بوو لە دوای كارەساتی داگیركردنەوەی كەركوك و ناوچە دابڕاوەكان لە كۆشكی ئەلیزێ پێشوازی لە نێچرڤان بارزانی سەرۆكی هەرێمی كوردستان وەكو سەرۆك دەوڵەتێك كرد و پشتگیری خۆی بۆحكومەتی هەرێم و دۆزی كورد ڕاگەیاند.
١٠- دوای كیمیابارانكردنی هەڵەبجە، لە پاریس كۆنگرەیەك بۆ قەدەغەكردنی چەكی كیمیایی لە جیهاندا بەسترا، بۆ ئەم كۆنگرەیە كورد و حكوومەتی عێراقیش بانگهێشت كرابوون،شاندی عێڕاقی بە سەرۆكایەتی (تاریق عەزیز) ئەوسا وەزیری دەرەوە بوو، ووتبوویان ئەگەر كوردەكان بەشداری بكەن، ئێمە دەكشێینەوە، وەڵامی فەرەنسییەكان ئەوە بووە، كە كوردەكان هەر بەشدار دەبن لە كۆنگرەكەدا، ئەوە بوو ئەوان كشانەوە و بەشدارییان نەكرد.
بەرێزان: دەوڵەتێكی ئەوروپایی كە لە رۆژی میحنەتا پشتگیری میللەتەكەمان بكات شایەنی ئەوەیە كەسانێك بچنە كونسوڵخانەكەیان و هەرەشەیان لێ بكەن؟ یان بچن هاوخەمی خۆیان دەرببڕن بۆ سەربڕینی و ئەو ژن و رووناكبیرانەی كە بە چەقۆ ملیان پەراندن. هەر بەم بۆنەیەوە دەست خۆشی لەو شاندە دەكەم كە لەگەڵ جێگری سەرۆكی پەرلەمان چوونە كونسوڵخانە و هاوخەمی خۆیان پێ ڕاگەیاندن. ئەمەش یەكێكە لە كارە هەرە باشەكانی ئەم خولەی پەرلەمان.

نوێترین

© 2016 Dwryan.net. All Rights Reserved.
Developed by Avesta Group and powered by Microsoft Azure