لەبارەی دابڕان/ پەیوەندی/

ئازار وایە ئیتر.. سیما ئارامەكان دەشێوێنێت!

27/10/2020


تەرزە جاف

"شەوباش

من ناوم كراسی ژنانەیە

ئەوەی نیشتیمان پێی شەرمە بیكاتە بەری خۆی

منم "

شێركۆ بێكەس وای وتووە ...

هەڵواسینی ئازارەكانی ژنان لەڕێگای كراس و جلوبەرگەكانیانەوە لە سلێمانی نوێ نییە !

دوابەدوای راپەڕین و ئازادكردنی سلێمانی و دەستگرتن بەسەر ئەمنە سوورەكەدا كابینەیەك دۆزرایەوە كە تایبەت بو بە دەستدرێژی كردنە سەر ژنان و كچانی پێشمەرگە و كەسوكاری پێشمەرگە و ئەنفالەكان.

پێشمەرگەكان بە شەرمەوە كراس و دەلینگ و ژێركراسە پوولەكە و سوورمە و جەلسەكانیان بە دەرگای كابینەكەدا هەڵواسیبوو،

ئێمە بە هەنگاوی پڕ فزووڵەوە چووینە لای كابینەكەوە، پێشمەرگەكان بە چاوێك پێیان وتین زۆر نەچینە ژوورەوە، ئەوان چاویان پڕ بوو لە شەرمەزاری و ئازارەكانیان ئاوەڵا كردبوو وەك برینێكی تەڕ كە خوێن و كێمی لێ بچۆڕێ.

دیارە هاونیشتمانییەكان ئەو ئازارەیان ئەوەندە داپۆشیوە تا ئەو ڕادەیەی كە بیریان چووەتەوە كە ئەو برینە ژنانەیە هێشتاش خوێنی لێدەچۆڕێ، هەر بۆیەش دوای سی ساڵ لە هەڵواسینی دەلینگ و دەرپێ و سوخمەی ژنەكان بە هەڵواسینی پارچە جلەكانیان كۆمەڵ ڕادەچڵەكێت و هیستیریا دەیگرێت!

ئەوەی كە كراسەكانی ئەمڕۆ و ئەوانەی دوێنێ جیادەكاتەوە سەرچاوەی ئازارەكەیە!

ئەوەی ئەمنە سوورەكە سەرچاوەكەی بەعسییەكان بوون و بەڵام ئەمەی ئەمڕۆ سەرچاوەكەی برا و مێرد و برایە ...

سووتاندنی كراسەكانیش دەلالەتە بۆ ئەوەی پرۆژەكە ئامانجەكەی پێكا و گەیشتە ناخی كۆمەڵگا ...

لە كوێوە كۆمەڵ گەیشت بەم ئەنجامەی كە شەرم لە ئازارەكان نەكات، بەڵام شەرم لە نمایشكردنی ئازارەكان بكات و تووڕە ببێت؟

ئەو پارچە پەڕۆیانە مێژوویەك دەگێڕنەوە كە بە بیانووە جیاوازەكانی كۆمەڵ و نەریت و ئایین و فەرهەنگ و كولتووری جیاكاری بەرانبەر ژنان خودی ژنان و كچانی ئەم وڵاتەیان كردووە بە قوربانی .

بەداخەوە سوپایەكی تیكتۆكەر و سناپەر هەیە كە ئەركی ئەوەیە رووخسارێكی ساختە بەم نیشتمانە ببەخشێت و بڵێت ئەم وڵاتە مەنزڵگەی ژنانی ئازادە و بە ناوی مۆدێل و ژنی ئازادەوە ئازارەكان داپۆشراون و بە ڕووتكردنەوەی لاق و لەتەری كۆمەڵێك كچ و ژنانی پاتاڵ و بەتاڵ كەیسی راستەقینەی ژنان بەنوكتە بكات و بڵێت ژن دنیایان خوارد !

ئەوەندەش بە ڕێكخراوی ئەمانە كاری خۆیان دەكەن كە چیتر كۆمەڵ بە ڕانی ڕووتی لەشفرۆشەكان ڕاناچڵەكێت، بەڵام بە سەرپۆشی قوربانییەكان دەهەژێت .

سەیرە كە هێرش دەكرێتە سەر كراس و پەڕۆكان كە گوایە جوان نین؟

جا كێ وتویەتی دەبێت ئازار جوان بێت؟

بە چ پێوەرێك دەبێت برینەكان دڵگیر بن؟

نوێترین

© 2016 Dwryan.net. All Rights Reserved.
Developed by Avesta Group and powered by Microsoft Azure