لەبارەی دابڕان/ پەیوەندی/

ژنانی داعش لەكەمپەكان هاوسەرگیریی دەكەن ‌و بەرەو توركیا هەڵدێن

21/09/2020


بەرپرسانی رۆژائاوای كوردستان دەستیانكردوە بەگواستنەوەی ژنانی بیانیی و منداڵەكانیان كە پەیوەستبون بەڕێكخراوی دەوڵەتی ئیسلامی (داعش)ەوە بۆ دەرەوەی كەمپێكی جەنجاڵ لەباكوری خۆرهەڵاتی سوریا تابخرێنە ژێر چاكسازیی، لەهەمانكاتدا كەسانێكی تریان لەڕێگەی پارەوە هەڵهاتون.

هەندێك لەژنانی داعش لەڕێگەی ئینتەرنێنەوە هاوسەرگیریی دەكەن و بەرەو توركیا هەڵدێن. هەسەدە مەترسیدارەكانیان جیادەكاتەوە لەپەشیمانبوەكان، ئەوەش دوای ئەوەی بۆی دەركەوت هەندێكیان هێشتا لەپەیوەندیدان لەگەڵ بەرپرسانی گروپەكە كەدەكرێت وەكو مەترسی سەیربكرێن.

ئەوانەی كەمتر توندڕەون دەبرێنە شوێنێك بۆ چاكسازیی

شێخموس ئەحمەد بەرپرسێكی رۆژاڤایە، بەئاژانسی فرانس پرێسی وت (76) خێزان لەتەمموزەوە لەكەمپی هۆلەوە بۆ رۆژ گوێزراونەتەوە، دوای داوایەك كەتیایدا پەشیمانییان دەربڕیوە لەپەیوەندییان بەو گروپە توندڕەوەوە.

بەرپرسەكە باسی لەنەتەوەكانیان نەكرد، بەڵام دەسەڵاتدارانی كورد وتیان بیانیەكانی كەمپی هۆل لە (50) وڵاتی جیاوازەوە هاتون.

دوای چەندین ساڵ پێشەنگیكردنی شەڕ دژی داعش بەپشتیوانی هاوپەیمانی نێودەوڵەتی پێشەنگیكراو لەلایەن ئەمریكاوە، كوردەكانی سوریا هەزاران گومانلێكراوی بیانییان بەندكردوە كەپشتیوانییان لەو گروپە تیرۆریستییە كردوە.

لەنێو ئەمانەدا چەكدارانی گومانلێكراوی زیندانكراو هەن، بەڵام هەزاران ژن و منداڵی تریش كەپەیوەندییان پێیانەوە هەیە و لەكەمپی ئاوارەكاندان -- زۆرێكیان لەچەندین خێمەی جەنجاڵی شاری هۆلدان.

گروپەكانی كۆمەك بەردەوام سكاڵایان دژی دۆخی ژیان لەو كەمپە كردوە كەتێیدا نزیكەی (70) هەزار كەسن دەبن و زیاد لەنیوەیان لەخوار تەمەنی پێنج ساڵەوەن و بەرپرسانی كوردیش یەكەمین كەیسی ڤایرۆسی كۆرۆنایان لەنێو دانیشتوانەكەیدا راگەیاند لەكۆتایی ئابدا.

شێخموس ئەحمەد وتی «كەمپی رۆژ فراوانكراوە بەهەماهەنگی نەتەوەیەكگرتوەكان و هاوپەیمانی نێودەوڵەتیش بۆ گواستنەوەی چەكدارانی بیانی داعش و ژن و منداڵەكانیان دوای ئەوەی داوای ئەوەیان كردوە كە هۆل بەجێبهێڵن.»

وتی «كەمترین رادیكاڵەكانیان ئامادەی چاكسازین و داوای گەڕانەوەیان كردوە بۆ وڵاتەكانیان و تێكەڵبونەوە بەكۆمەڵگاكانیان، پەشیمانیشیان نیشانداوە.»

بەگشتی چاوەڕواندەكرێت نزیكەی (400) خێزان لەهۆلەوە بۆ رۆژ بگوێزرێنەوە، كە لەوێ لەخێمەی تایبەت بەخۆیاندا دەژین.

وڵاتانی خۆرئاوا بەگشتی دودڵن لەوەرگرتنەوەی ئەو هاوڵاتیانەیان كەپەیوەندییان بەداعشەوە كردوە لەباكوری خۆرهەڵاتی سوریا، هەرچەندە هەندێكیان ژن و منداڵیان وەرگرتۆتەوە، بەگوێرەی كەیس بەكەیس.

هەوڵی هەڵاتن و هاوسەرگریكردن لەڕێگەی ئینتەرنێتەوە

بەرپرسانی رۆژاڤا وێڕای ئەوەی كەڕوبەڕوی هەڕەشەی شانە نوستوەكانی داعش دەبنەوە، توشی چەند كێشەی دیكە دەبنەوە، وەكو هێرشی ناوەناوەی میلیشیاكانی سەر بەتوركیا، ئەمە جگەلەوەی ئەركی چاودێری (70) هەزار خێزانی زیندانیانی داعشیان لەئەستۆیە كەزۆرێكیان بیانین و وڵاتەكانیان نایانەوێت وەریان بگرنەوە.

پێشنیاری نەتەوەیەكگرتوەكان لەبارەی گەڕاندنەوەی زیندانیانی داعش بۆ ئەو وڵاتانەی لێی هاتون، لەوانە وڵاتانی رۆژئاوا، دەنگی نەهێنا. بەگوێرەی نوسراوێكی نەشناڵ ئینترێست، ئەو پێشنیارە لە 21ی ئاب لەلایەن ئەمریكاوە ڤێتۆ كرا تاچارەنوسی (70) هەزار زیندانی بەناڕونی بمێنێتەوە.

بەرپرسانی هەسەدە ئەم زیندانیانەیان لەدو كەمپی هۆل و رۆژدا نیشتەجێكردوە، بەڵام زیندانییەكان لەساڵی 2018وە بەردەوام هەوڵی هەڵاتن دەدەن بەتایبەت ژنان.

دكتۆر ئان سپكهارد، مامۆستای زانكۆی جۆرج تاون و بەڕێوەبەری ناوەندی نێونەتەوەیی توێژینەوەكان بۆ توندئاژۆیی پێشتر وتی «ئەو ژنانەی داعش كە لەكەمپی ئەلهول لەناوچەی ژێر كونترۆڵی كوردەكانی سوریا زیندانی كراون بەخەرجكردنی (10 تا 20) هەزار دۆلار دەتوانن بەشێوەی قاچاخ و بەشاراوەیی هەڵبێن».

زیاتر وتی ژنانی داعش بەخەرجكردنی ئەو بڕە پارەیە، بەشێوەی قاچاخ لەكەمپی هۆل كە لەژێر كونترۆڵی هێزەكانی سوریای دیموكراتدایە، هەڵاتون.

 ژمارەیەكیان چونەتە ئیدلیبی سوریاو ژمارەیەكیشیان لەڕێگای ناوچە سوریایەكانی ژێر كونترۆڵی توركیاوە خۆیان گەیاندۆتە توركیا. ئەم بابەتە هەفتانە درێژەی هەیەو هێزەكانی سوریای دیموكرات پشتڕاستیان كردۆتەوە.

پرسی هەوڵی زیندانیانی داعش بۆ هەڵاتن لەكەمپی ژێر چاودێریی هەسەدە بوەتە دیاردەیەكی جیددی و مەترسیدار. بۆیە بەرپرسانی رۆژاڤا دەستیان كردوە بەجوداكردنەوەی زیندانییە مەترسییدارەكان لەكەمپی هۆل و ژمارەیەكیان بۆ كەمپی رۆژ گواستوەتەوە. بۆ نمونە هەفتەی رابردو ژنان و منداڵانی ئوسترالیایی لەبەشێكی كەمپی هۆلەوە كە بەشەقامی سیدنی ناوی دەركردوە؛ بۆ كەمپی رۆژ گواسترانەوە.

بەڕێوەبەری سەنتەری نێودەوڵەتیی توێژینەوەكانی توندوتیژیی لەبارەی هۆكارەكانی یارمەتیدان بەهەڵاتنی ژنە داعشەكان دەڵێت «هۆكاری زۆر هەن بۆ یارمەتیدان بۆ هەڵاتنی ژنانی داعش لەكەمپی ژێر كونترۆڵی كوردەكان.

 بۆ نمونە بەهۆی نالەباربونی دۆخی كەمپەكە وەڕەز بون و ئەگەر بتوانن لەڕێگای ئینتەرنێتەوە هاوسەرگیریی لەگەڵ ئەوروپیەك دەكەن و پارەی پێویست بۆ هەڵاتن لەكەمپەكە فەراهەم دەكەن و كەمپەكە بەجێدێڵن.

ژنانی زیندانیكراو لەهۆل لەڕێگای تۆڕە كۆمەڵایەتییەكانەوە وەكو ئینستاگرام، تێلێگرام و تۆڕی پێدانی پەی بال داوای یارمەتییان كردوە تا بەشێوەی شاراوە هەڵبێن.

لەلایەكی دیكەوە، كریستۆفر میلر، بەڕێوەبەری سەنتەری بەرەنگاربونەوەی تیرۆر لەئەمریكا هۆشداری دەدات كەداعش تەركیزی كردوە لەسەر ئەندامە زیندانییەكانی لەناوچەی ژێر دەسەڵاتی كوردانی سوریا.

مامۆستای زانكۆی جۆرج تاون ئاماژەشی دا بەپرسی نەبونی توانای دارایی بەرپرسانی كوردی سوریا بۆ بەڕێوەبردنی كەمپەكە و هەروەها داواكردن لەوڵاتانی هەناردەكەری داعش بۆ وەرگرتنەوەی داعشەكان.

هێزەكانی سوریای دیموكرات بۆ ئیدارەدانی زیندان و زیندانییەكان و پێدانی موچەی هێزەكانیان یارمەتیی دارایی لەهاوپەیمانان وەردەگرن، بەڵام دیارترین شتێك كەئێستا ئەو هێزانە دەیانەوێت ئەوەیە وڵاتانی جیهان هاوڵاتیانی داعشی خۆیان كەئێستا لەزیندانەكانیاندان وەربگرنەوە.

گۆڤاری نەشناڵ ئینترێست هۆشداریی داوە ئەگەر وڵاتانی بیانی لەوانە ئەوروپییەكان هەوڵنەدەن بۆ گەڕاندنەوەی داعشە هاوڵاتییەكانی خۆیان لەناوچەی ژێر دەسەڵاتی كوردانی سوریا، ئەگەری زیاتربونی هێرشەكانی ئەو گروپە تیرۆریستییە لەئارادایە.
سەرچاوە/ هاوڵاتی

نوێترین

© 2016 Dwryan.net. All Rights Reserved.
Developed by Avesta Group and powered by Microsoft Azure