لەبارەی دابڕان/ پەیوەندی/

چەند سەرنجێك لەبارەی خوای خێر و خوای شەڕ ! مەلا بەختیار و نەوشێروان

19/09/2020



محەمەد هەریری

وەك موسڵمانان كە دەربارەی شەڕەكانی نێوان خۆیان وەك شەڕی الجمل و صفین دەڵێن، خوا دەستمانی لێ پاراستوە، با زمانمانی پێ پیس نەكەین. بەهەمان شێوە دەڕوانمە ئەو مێژووەی شەڕی حزبە كوردیەكان كە پڕ و تەژییە لە پیسی و پۆخڵی و خوێن و خیانەت و چاوبڕینە نامووسی یەكتر ونامەردی و دڕندەیەی ناو شاخەكان. هەر كتێبێ یان چەند لاپەڕەیەك لە بیرەوەریەكانی ناو شاخ دەخوێنیتەوە، واهەست دەكەیت سوخرەكێشی دەكەیت و هەست دەكەی ژینگەی دەروونی و زیهنیت پیس دەكات.

من لە یەكەم ڕۆژی دەركەوتنی نەوشێروان وتارێكم لە ستاندارد نووسی، ئەگەر دەستم كەوتەوە بە ئاسانی بڵاوی دەكەمەوە، بە كورتی گووتم: بەرلەوەی نەوشێروان لەو وێنە دیموكراتیە نوێیە و لەو خەباتە نەرمە مەدەنیە وەك ڕزگاركەرێك دەركەوێت، دەبێ بە وتارێكی ڕەخنەی خودی واتە نقد الذات، دەست پێبكات، چونكە ئەو سۆفیەك نییە تەنها چەند گوناهێكی شەرعی كردبێت بیەوێ بەبێدەنگی بگەڕێتەوە لای خوا و تۆبە بكات لەو تاوانانەی كە ئەنجامی داون.

نەوشێروان زۆر هەڵە و تاوانی كردوە لەناو ئەوەی پێی دەڵێن خەباتی چیا، دەبێت بەخۆداچوونەوە و ڕەخنەی خودی بە ئاشكرا و بە شێوەیەكی جەماوەری ئەنجامی دات.

ئەو كاتەش خەڵكێكی زۆر بەو وتارەی من قەڵس بوون، چونكە دەركەوتنی گۆڕان لەو كاتە وەك هاتنی گۆدۆ و مەهدی بوو، خەڵك هەمووی لە چاوەڕوانینی گۆدۆیەك دابوون. بەڵام خۆشبەختانە فەیسبوك نەبوو تا بە لێشاو جوێنی دەمڕووتە عاتیفیەكانم پێ بدرێت.

منیش ئەو كاتە لە چاوەڕوانی گۆدۆیەك بووم ئەو كاتە لەبەر ئەو هەموو گەندەڵیەی هەبوو و كە تا ئێستاش هەیە وزیاتریش بووە. بەڵام تووشی خەمۆكی بووم كە نەوشێروان ئەو ڕۆڵەی گۆدۆ یاری بكات، بەو هەموو سیفاتە وشك و دڵڕەقی و میزاج خوێناویەوە. چونكە من لەناو شار لە ڕێگای ڕێكخستنەكانی نهێنی بەردەوام گوێم لە كار و گفت و كردەوەكانی نەوشێروان دەبوو، بە تایبەتی لە شەڕی خیانەتكاری و دیلكوژی پشت ئاشان و قڕناقە.

بەڵام ئەوەی كەمەك دڵم پێی خۆش بوو، تێنەوەگلانی نەوشێروان بوو لەو گەندەڵییە سەرتاسەرەی بەرپرسانی كورد، دەمگووت ئەو گەندەڵ و دز و مافیایانە مەگەر بە یەكێكی نیمچە تێوەگڵاو و شارەزا لە مێنتاڵیتی و عەقڵیەتی خۆیان لەناو بچن، بەڵام سەرەنجام دەركەوت ئەویش بەدەرنەبوو لە هەموو تێوەگڵاوەكانی سەرۆك و سەركردەكانی تری كورد. ئەویش نەیتوانیبوو هەتا منداڵەكانی خۆی بە پاك و دەستپاكی پەروەردە بكات، ئێستا وەك هەر بەچەیەكی تری سەركردە گەندەڵەكان، سەركردەبەچەی گەندەڵن.!

هەر ئەوەش نا، نەوشێروان لە خاڵی دووەمیش واتە توانای بەرەنگاربوونەوەی سەركردە مافیاكانی حزبە شڕەخۆرەكانی بەناو كوردایەتی، بە سەدان هەزار دەنگەوە، پاشەكشەی كرد بە بیانووی ئەوەی نایەوێ مێژووێكی خوێناوی بۆخۆی تۆمار بكات، وەك بڵێی مێژووەكەی ڕابڕدووی وەك جلی سپی بێ پەڵە بێ و پڕوشكە خوێنێكیشی پێوە نەبێ! نەیدەزانی ئەگەر ئەو مافیایانەی ڕاماڵیبا ڕەنگە بەو كارەی مێژووی كۆنی خۆی پاك كردایەوە.

ئێستا كتێبەكەی مەلا بەختیار لەبری بیرەوەری دەخوێنمەوە، هەر لە سەرەتاوە هێڵنجم دێت لەو هەموو كوردكوژی و نامەردیە و خیانەت لێككردنە، ئەگەر كورد بەو هەموو دڕندایەتیەی بەرامبەر یەكتری دەنوێنن، چارەگی بەرامبەر دوژمنانی گەلی كوردیان نواندبا ئێستا ڕزگارمان ببوو. بەڵام هەمیشە نەرم و نیان بەرامبەر دوژمن، دڕندە بووین خۆبەخۆیی. بۆیەش دەیخوێنمەوە چونكە ئەو هێرشە پان و بەرین و پڕ سوكایەتیەی دژی مەلا بەختیار بەڕێوەیە هیچ پاساوێكی لۆژیكی بۆ نییە، كابرا كارەكتەرێكی بەرچاوی ئەو شاخە بوو، ئەگەر گەندەڵیش بێ، دڵنیام بەقەد نەوشێروان بۆ منداڵەكانی جێ ناهێڵێت!

لە ڕووی ڕاستگۆییش بۆ خەمی دیموكراسیەت و عەلمانیەت، هێشتا من مەلا بەختیار لەبارتر دەبینم، لە كاتێكدا مەلا بەختیار بە ئاشكرا شەڕی فكر و بیری دینی تووندڕەوی و تیرۆرستی دەكات بە چەند بڵاوكراوەیەك و كۆڕ و سیمنار و ڕێكخراو و سایتێك وەك دابڕان و چاودێر، جا سەرەڕای هەر سەرنج و ڕەخنەیەكیشمان لە میكانیزمی ئەو بەرەنگاربوونەوەیە.

لەلاكەی تر نەوشێروان هێندە سازشكار و بێ هەڵوێست بوو بەرامبەر ئەو ڕەوتە دینییەی ترسناكەی ئیسلامی سیاسی كە سەری هەڵدا لە كوردستان، تا ڕادەی ئەوەی موغازەلە كردنیان، ئەگەر عەلی باپیر ڕاست بكات نەوشێروان بە دەوڵەتی ئیسلامی سیاسیش ڕازیبووە، یان بۆ فریودان وایگووتوە!

گۆڕان پڕ ببوو لە سەلەفی و ئیسلامی سیاسی، وەك یەكێ لە حەوت عاجباتی زەمان، كرێكار بەو هەموو بیرە ڕادیكاڵی و قوتبیەوە فەتوای پشتگیری نەوشێروان ی دا!

ئەو هێز و گوڕەی نەوشێروان لەماوەی دروستبوونی گۆڕان بە بوژانەوەی ئیسلامی سیاسی دا، من دڵنیام جوڵانەوەی ئیسلامی سیاسی بە دەیەها ساڵی تر، ئەو هێز و گوڕەی پەیدا نەدەكرد. ئێستاش ئەو هەموو لاواندنەوەی نەوشێروان و ئەو هەموو هێرشەی سەر مەلا بەختیار لە بەشێكی زۆری ڕەنگدانەوەی هەڵوێستی شەقامی ئیسلامی سیاسییە لە نەوشیروان و مەلا بەختیار، كە یەكەمیان بە فریشتەكراوە و دووەمیان ئەهریمەنكراوە!

ئەم وتارە لە پەڕەی تایبەتی محەمەد هەریری لە فەیسبوك وەرگیراوە

نوێترین

© 2016 Dwryan.net. All Rights Reserved.
Developed by Avesta Group and powered by Microsoft Azure